Navigation

Inhaltsbereich

  • Erste Mitteilung
  • Neuen Beitrag einfügen
Clera reducziun dals delicts e dals accidents da traffic

Il dumber dals delicts e dals accidents da traffic en il chantun Grischun è sa reducì clera- main l'onn passà. Quai mussa la statistica criminala e la statistica dals accidents da traffic 2005 ch'è vegnida preschentada da la polizia chantunala dal Grischun la mesemna ad ina conferenza da medias a Cuira. Il dumber total dals delicts è sa reducì per bunamain in tschintgavel ad 8'442 cas (onn precedent 10’169). La quota da scleriment ha anc ina giada pudì vegnir augmentada levamain en cumparegliaziun cun l'onn precedent; mintga terz delict è vegnì sclerì. Als delicts sclerids èn stadas participadas 1'737 persunas svizras e 1'202 persunas estras; la quota da persunas minorennas importà 16 pertschient (487 persunas minorennas). Tar 2'444 accidents da traffic (onn precedent 2'675) han 23 (25) persunas pers la vita, 835 (917) persunas èn vegnidas blessadas.

A la conferenza da medias ha il schef dal departament da giustia, polizia e sanitad, cusseglier guvernativ Martin Schmid, rendì attent che la polizia chantunala haja gì da surpigliar ils ultims onns novas incumbensas supplementaras: intervenziuns en cas da violenza a chasa, il dumogn dal traffic pesant e las mesiras da dosar tal sin la A13, dentant er acziuns da la polizia da segirezza che basegnan spezialmain bler persunal sco il WEF e bain er la EURO 08 che stat avant porta. "Ultra da quai daventa la lavur da la polizia criminala adina pli pretensiusa e las pretensiuns a las retschertgas da TI s'augmentan pli e pli. Pretensiuns pli grondas vegnan ozendi er fatgas a las proceduras polizialas da retschertga", ha il schef dal departament remartgà.

La statistica sco spievel da l'effectiv da polizia
"Las valurs statisticas èn adina er in spievel da l'effectiv da polizia per propi", ha punctuà il cu- mandant da la polizia chantunala dal Grischun, Markus Reinhardt. "Las reducziuns da las prestaziuns ch'èn colliadas cun quai han en emprima lingia consequenzas per il sectur preventiv, cunquai che accidents da traffic e cas criminals ston vegnir elavurads en mintga cass." Ina meglieraziun dastgia vegnir spetgada il pli baud l'october 2007, cur che las aspirantas ed ils aspirants entran – suenter lur instrucziun ad Amriswil – en il corp da polizia dal Grischun. Las novas entradas previsas na pudessan dentant betg remplazzar las extradas.

Ina gruppa da lavur analisescha la violenza da giuvenils
La quota da persunas minorennas (= sut 18 onns) vi dal total da las delinquentas e dals delinquents è sa muvida tranter ils nivels dals dus onns precedents e n'ha pia mussà naginas valurs significantas sut il titel "criminalitad da giuvenils". In augment ha dentant stuì vegnir constatà tar ils delicts da violenza. "L'onn passà avain nus constatà en cas singuls in augment dals delicts commess da giuvenils", ha declerà Gianfranco Albertini, schef da la polizia criminala. "Quant enavant che questas constataziuns èn significantas per in svilup, na sa lascha betg dir sulettamain a maun da questas cifras." Questa primavaira vegnia ina gruppa da lavur da la polizia chantunala e da polizia da la citad ad analisar ils eveniments. Alura vegnian eventualmain er prendidas las mesiras correspundentas.
L'onn 2005 è sa mussada ina clera reducziun dals enguladitschs e da las denunzias da delicts con- cernent narcotics. La reducziun la pli evidenta hai dà tar il consum e tar il commerzi da cannabis e da cocain.
La polizia chantunala dal Grischun ha retschertgà l'onn 2005 en 94 (onn precedent 107) mortoris extraordinaris, tranter quels 35 (41) suicidis, 10 (14) accidents da muntogna, 8 (3) accidents da lavina, 1 (6) accident da skis, 1 (1) accident da bogn e 4 (1) accidents da lavur; persunas mortas da drogas han stuì vegnir registradas 6 (2). Plinavant èn vegnids sclerids in delict da mazzament accumplì ed in delict da mazzament empruvà.
Sa reducids èn ils grevs delicts sexuals. Uschia han ins stuì registrar 7 violaziuns (onn precedent 11), 10 (18) acts sexuals cun uffants e 2 (4) constricziuns sexualas. La gronda part da quests cas è vegnida sclerida. La reducziun tar ils delicts cunter la libertad sa mussa cunzunt tar las smanatschas. Lur dumber è sa smesà en cumparegliaziun cun l'onn precedent.
Dals 106 incendis (onn precedent 98) èn vegnids sclerids 80 cas. Tar 16 (19) cas sa tractavi dad incendiaments.

Mintga 3 ½ uras in accident da traffic
L'onn 2005 èn capitads 2'444 accidents da traffic (onn precedent 2'642). Quai signifitgescha ina reducziun da ca. 8 pertschient en cumparegliaziun cun l'onn precedent. 23 persunas èn vegnidas blessadas mortalmain. Tranter quellas eran 13 motociclistas e motociclists (onn precedent 11). Sco "frappant" ha Robert Willi, schef da la polizia da regiuns e da traffic, designà il segment da vegliadetgna da las persunas tranter 40 e 50 onns cun set accidents mortals da moto.
Anc adina han stuì vegnir registrads blers accidents da glischnada resp. accidents persunals. Sco gia l'onn precedent èn vegnidas mazzadas 11 persunas en quest connex.
Mintga 3 ½ uras è capità in accident da traffic en il chantun Grischun, mintga 10 uras è vegnida blessada ina persuna tar in accident e mintga 16 dis è vegnida mazzada ina persuna en il traffic sin via.
La statistica dals accidents da traffic e la statistica criminala 2005 po vegnir consultada en l'internet sut www.kapo.ch.

Quelle: polizia chantunala dal Grischun
Neuer Artikel