Ils 21 d'avust 2006 cumenza il nov onn da scola en la gronda part da
las vischnancas
grischunas. Millis scolaras e scolars cumenzan la scola quest atun. La
polizia chantunala dal
Grischun e la polizia da la citad da Cuira sco er la CMP lantschan
in'acziun communabla per il
cumenzament da la scola: En l'entir Grischun vegnan repartids chapels
cotschens a las
scolarinas ed als scolarins da l'emprima classa. Quests chapels cun pala
dattan en egl en il
traffic sin via e daventan in'attracziun per las automobilistas e per
ils automobilists. Centrala
è la segirezza da las scolarinas e dals scolarins da l'emprima classa.
Blers uffants dumbran gia oz ils dis fin che la scola cumenza
uffizialmain. Il mintgadi da scola vegn a
chaschunar intginas midadas. Tranter auter vegn barattada
l'enconuschenta via da scolina cun ina nova
via da scola. Sch'i ston vegnir traversadas vias sin quella, è quai in
grond privel per las pitschnas e per ils
pitschens. La polizia s'engascha ensemen cun la CMP per minimalisar
quests privels ed ella sa stenta da
garantir ina via da scola segira.
L'engaschi serva a la segirezza ed en il senn pli vast a promover il
moviment dals uffants. Il surpais è
fitg derasà tar uffants. In med cunter quai è da sa mover
suffizientamain en il mintgadi, er sin la via da
scola. Cun exercitar situaziuns difficilas specificas en il traffic sin
via vegnan promovidas l'independenza
e la confidenza en sasez dals uffants. Quest trenament en il traffic
levgescha als geniturs da laschar ir lur
uffants a pe a scola.
L'acziun vegn sustegnida cun placats "Cumenzament da scola! Attenziun
uffants!" e cun flyers. Las
collavuraturas ed ils collavuraturs da las basas da la polizia da
traffic, dals posts da polizia e da
l'instrucziun da traffic vegnan a survegliar las vias da scola durant
l'emprima emna. Gia la segunda emna
da scola cumenza l'instrucziun da traffic en las scolinas.
En spezial renda la polizia chantunala attents tut las participantas e
tut ils participants da traffic a lur
funcziun d'exempel. Ils uffants emprendan il meglier cun imitar, tant en
il senn positiv sco er en il senn
negativ. Tuts duessan esser conscients da quest fatg e gidar – cun lur
cumportament – a cuntanscher ina
buna instrucziun da traffic.
Tips per ina via da scola segira
Accumpagnai Voss uffant pliras giadas sin la via da scola u tar il
bus da scola. Na tschernì betg
la via la pli curta, mabain la via la pli segira. Sche Vus giais a
prender Voss uffant, spetgai
directamain a la sortida da la scola e betg da l'autra vart da la via.
Faschai stim che Voss uffant sa fermia, avant che metter pe sin la
via (spetgar, guardar, tadlar,
chaminar). Voss uffant duai spetgar tar la strivla melna, fin ch'ils
autos èn sa fermads dal tuttafatg.
Tramettai Voss uffant a temp a scola. Currim e prescha augmentan
la ristga d'accidents.
Laschai ir a scola cun velo Voss uffant pir cur che Vus essas
segirs ch'el vegn a frida cun il
traffic e pir cur che la scola e pir cur che Vus retegnais quai per bun.
Insisti che Voss uffant portia
ina chapellina e la purtai er sez.
Quelle: Kantonspolizei Graubünden