Navigation

Seiteninhalt

Grischun: Acziun da prevenziun cunter accidents cun motos

  • Erste Mitteilung
  • Neuen Beitrag einfügen
Cun il slogan "Viver pli ditg cun charrar cun giudizi" cuntinuescha la polizia chantunala dal Grischun er quest onn cun sia activitad preventiva e repressiva a favur da la segirezza dal traffic per motociclistas e per motociclists. Durant ils mais da zercladur e d'avust han lieu differentas acziuns da prevenziun, e quai er cun reparter broschuras a las motociclistas ed als motociclists. Communablamain vegn discutà davart bleras dumondas da la segirezza. Per lung da las vias dals pass e per lung da vias cun bleras stortas vegnan ultra da quai montads placats per contribuir a la prevenziun d'accidents.
Entant ch'il dumber da las persunas ch'èn sa disgraziadas en tut il traffic sin via sa reducescha dapi onns, resta quest dumber tar las motociclistas e tar ils motociclists anc adina sin in nivel aut. Bain èn morts l'onn 2006 main motociclistas e motociclists che anc durant ils dus onns precedents. 8 motociclistas e motociclists èn sa blessads mortalmain l'onn passà tar accidents en il Grischun (2005: 13 persunas). 40 persunas èn vegnidas blessadas grevamain tar accidents cun motos.

Mo il corp sco plimatsch
Las mesiras da prevenziun han la finamira da render attent las motociclistas ed ils motociclists als privels e d'als sensibilisar per il fatg ch'ellas e ch'els èn quellas persunas ch'èn periclitadas il pli fitg en il traffic. Motociclistas e motociclists n'han naginas zonas deformablas effizientas vi da lur vehichels. Lur suletta protecziun è lur vestgadira. Perquai duessan ellas ed els adina avair in equipament optimal ed esser sin viadi cun egls anc pli averts che uschiglio per uschia pudair tegnair uschè bass sco pussaivel ils privels d'accidents u las consequenzas d'accidents.

Atgna culpa tar la gronda part dals accidents
En cumparegliaziun cun l'entira Svizra ha il chantun Grischun – pervia da sias vias da pass e pervia d'autras vias attractivas sco er pervia da sia topografia – ina posiziun speziala. Cuntrari ad autras parts dal pajais datti en egl en il Grischun che var 85 pertschient da las motociclistas e dals motociclists ch'èn vegnids blessads grevamain e ch'èn vegnids mazzads han chaschunà in accident da traffic per atgna culpa. 68 pertschient da tut ils accidents cun motos han gì lieu en stortas. Stortas han in'attracziun speziala per motociclistas e per motociclists. Sche questa attracziun daventa memia gronda, po quai avair consequenzas fatalas.

Scolaziun regulara – er sche las participantas e sch'ils participants da traffic èn versads
La statistica dals accidents da traffic mussa che betg mo las motociclistas ed ils motociclists giuvens èn periclitads il pli fitg, mabain cunzunt er las motociclistas ed ils motociclists sur 30 onns fin stgars 50 onns. Bleras dad ellas e blers dad els han profità da l'access direct a la moto grazia a la nova regulaziun dal permiss da manischar dapi l'onn 2003 u han fatg – il pli per motivs famigliars – ina pausa da lur moto ed han ussa puspè cumenzà a charrar cun lur maschina.
Er motociclistas e motociclists che sa movan uschiglio gia dapi onns en il traffic duessan perquai frequentar curs da perfecziunament voluntars. A chaschun da tals curs vegnan elavurads temas impurtants sco franar, charrar tras stortas e l'atgna fitness. Il perfecziunament duai er esser in agid per metter en dumonda l'atgna moda da charrar e per dar la preferenza ad ina moda da charrar defensiva.
Nua che quai fa da basegn, vegn la stagiun da motos 2007 accumpagnada er da mesiras repressivas tras la polizia chantunala dal Grischun. L'acziun "Viver pli ditg cun charrar cun giudizi" dura dal matg fin l'october 2007.
La polizia chantunala dal Grischun giavischa a tut las participantas ed a tut ils participants da traffic in viadi segir ed a las motociclistas ed als motociclists ina bella stagiun da motos, uschia che tuttas e che tuts turnian saunamain a chasa.

Quelle: Kantonspolizei Graubünden
Neuer Artikel