Navigation

Seiteninhalt

Cuira: La polizia chantunala dal Grischun ed il corp da guardias da cunfin lavuran en l'emprima centrala d'alarm e d'acziuns communabla

  • Erste Mitteilung
  • Neuen Beitrag einfügen
La polizia chantunala dal Grischun ed il corp da guardias da cunfin regiun III han mess en funcziun a Cuira centrala d'alarm e d'acziuns (CAA) communabla, l'emprima da ses gener en Svizra. Suenter in temp da planisaziun e da construcziun da quatter onns sa preschenta questa nova centrala d'alarm e d'acziuns sco bain la pli moderna da la Svizra. Sco center da direcziun e da clamada ch'è en funcziun di e notg serva ella ad in grond dumber da partenarias e da partenaris. Il mardi è la centrala d'alarm e d'acziuns vegnida preschentada a la publicitad a chaschun d'ina conferenza da medias.
La nova centrala dispona da set plazzas da lavur ch'èn arranschadas en moda ergonomica e che vegnan occupadas da las manadras e dals manaders d'acziun da la polizia chantunala sco er da las operaturas e dals operaturs da la guardia da cunfin. "Questa centrala è vegnida concepida tenor las enconuschientschas las pli novas e stat a disposiziun di e notg per dumagnar situaziuns normalas, situaziuns spezialas e situaziuns extraordinarias", ha declerà Markus Reinhardt, cumandant da la polizia chantunala dal Grischun.

Il sistem funcziuna senza problems
In'emprima centrala d'alarm da la polizia chantunala dal Grischun è vegnida messa en funcziun l'onn 1969. L'october 1982 è ella alura vegnida translocada entaifer l'edifizi e concepida tuttafatg da nov. Pervia da midadas tecnologicas èsi daventà necessari da la renovar l'onn 1994. Cun in contract da service spezial ha la durada dal funcziunament dal calculatur da la centrala operativa ch'è vegnì installà da sias uras pudì vegnir prolungada da l'onn 2003 fin la fin da l'onn 2006. Il di da festa per las collavuraturas e per ils collavuraturs da la polizia chantunala è stà ils 12 da zercladur 2007, cur che la nova centrala actuala è vegnida messa en funcziun. Ils 15 d'avust 2007 è alura er vegnì vitiers il corp da guardias da cunfin. "Avant la midada hai dà dis ed emnas plain hectica. Ma tut funcziunescha senza problems", ha explitgà il cumandant da la polizia chantunala ch'è visiblamain cuntent.

Soluziuns orientadas al futur
Er Andreas Hitz, cumandant dal corp da guardias da cunfin regiun III, è intgantà da la nova centrala d'alarm e d'acziuns che vegn manada communablamain. En ses pled ha el menziunà en spezial la moda e maniera, co che la nova centrala è vegnida stgaffida. "Il consentiment dal pievel per las cunvegnas d'associaziun a la reglamentaziun da Schengen e l'aboliziun da la controlla sistematica da persunas al cunfin pretendan mesiras substitutivas effizientas", uschia Andreas Hitz. Per dumagnar questas novas sfidas saja il corp da guardias da cunfin sa reorganisà cumplettamain per il 1. da schaner 2007. Il commando regiunal dal corp da guardias da cunfin III haja translocà ses domicil da Schaffusa a Cuira. "La citad da Cuira è vegnida elegida sco nov lieu per la centrala d'alarm ost dal corp da guardias da cunfin spezialmain, perquai ch'il chantun Grischun è sa declerà pront d'integrar nossa centrala d'alarm en la nova CAA da la polizia chantunala", ha motivà Andreas Hitz questa midada da domicil. Grazia a la translocaziun a Cuira han ins la finala pudì transferir almain 13 plazzas da lavur en il Grischun. Questa centrala communabla ha colonel Hitz titulà sco soluziun progressiva ch'è orientada al futur. Questa soluziun nunconvenziunala permettia a las partenarias ed als partenaris da trair a niz sinergias e d'avair a disposiziun persunal per la lavur a la front.

Tecnica bain chapibla
Ina survista cronologica da la moda, co che la nova centrala è vegnida stgaffida sco er dals aspects cumplexs da la tecnica, ha dà Ferdinand Feusi, schef dal support tar la polizia chantunala dal Grischun e manader general dal project. El ha per exempel mussà ch'ins haja stuì tschentar circa 20 kilometers cabels per la nova CAA. Ils custs per la centrala han importà circa 9 milliuns francs. Il manader general dal project ha constatà cun plaschair ch'il nov sistem funcziunia en moda fitg stabila, senza interrupziuns ed a plaina cuntentientscha da las manadras e dals manaders d'acziun sco er da las operaturas e dals operaturs.
Che las manadras e ch'ils manaders d'acziun sco er che las operaturas e ch'ils operaturs èn sa sentids bain e svelt da chasa en la nova centrala han mussà Erwin Banzer e Roman Camenisch, ils schefs da las manadras e dals manaders d'acziun da la polizia chantunala dal Grischun resp. da las operaturas e dals operaturs dal corp da guardias da cunfin. Il local da lavur climatisà vegn illuminà en moda indirecta, l'autezza da las surfatschas da lavur po vegnir adattada ed ils set moniturs per mintga plazza da lavur èn vegnids arranschads en moda bain survesaivla. Tar las tecnicas cumplexas saja vegnida dada gronda paisa ch'ellas possian vegnir applitgadas en moda simpla, ha declerà Erwin Banzer. E Roman Camenisch ha punctuà che la collavuraziun saja colleghiala ed amicabla. Ina scolaziun fundada en il champ d'incumbensas da la partenaria respectiva u dal partenari respectiv vegnia ussa fatga pass per pass. "Uschia creschan ensemen duas culturas d'interpresa en l'interess da la chaussa communabla e da la segirezza en il chantun Grischun", sco ch'il cumandant da la polizia chantunala colonel Markus Reinhardt ha formulà quai.

Quelle: polizia chantunala dal Grischun
Neuer Artikel