Navigation

Inhaltsbereich

  • Erste Mitteilung
  • Neuen Beitrag einfügen
Praticamain naginas midadas tar la quota da delinquentas e da delinquents giuvenils
La quota da delinquentas e da delinquents giuvenils vi da tut ils delicts ch'èn vegnids registrads en il chantun Grischun l'onn 2007 n'è - cun 15 pertschient - praticamain betg sa midada en cumparegliaziun cun l'onn precedent. Entant ch'il dumber total dals delicts registrads è sa reducì per circa 10 pertschient en cumparegliaziun cun l'onn 2006, è il dumber dals accidents da traffic s'augmentà per circa 10 pertschient. Quai mussan la statistica criminala e la statistica dals accidents da traffic 2007 che la polizia chantunala grischuna ha preschentà la gievgia a chaschun d'ina conferenza da medias a Cuira.
"Las valurs statisticas en la lavur da la polizia na servan betg mo ad atgnas finamiras, mabain èn adina puspè in motiv per nus da metter prioritads", ha punctuà Markus Reinhardt, il cumandant da la polizia chantunala dal Grischun. Talas prioritads sajan er indispensablas en vista a las resursas da persunal limitadas. Sco ch'il cumandant da polizia ha declerà, saja il chantun Grischun tuttavia segir; las collavuraturas ed ils collavuraturs da la polizia chantunala dal Grischun vegnian a far tut il pussaivel per garantir questa segirezza er en l'avegnir.

Naginas tendenzas areguard tscherts delicts
La statistica criminala na mussia naginas tendenzas areguard tschertas categorias da delicts, sco quai che Gianfranco Albertini, il schef da la polizia criminala ha declerà. "Il dumber total dals delicts ch'èn vegnids registrads l'onn 2007 en il chantun Grischun è sa reducì en cumparegliaziun cun l'onn precedent; el sa chatta sin il nivel dals onns 2000 e 2001." Cun 3'069 delicts sclerids (onn precedent 3'457) è vegnida cuntanschida ina quota da 38 pertschient (39 pertschient). Als delicts sclerids èn stadas participadas 1'838 (2'021) persunas svizras e 1'122 (1'197) persunas estras. La quota da giuvenils importa 15,2 (16,1) pertschient.
Tar ils delicts da facultad hai dà paucas midadas tar ils enguladitschs cun infracziun. Ils delicts d'engion èn sa reducids, entant ch'il dumber da cas da rapina è s'augmentà. Naginas midadas n'hai er dà tar il dumber da las blessuras corporalas intenziunadas. Delicts da mazzament u emprovas da mazzament hai dà 3 (4).
Sco quai che Albertini ha explitgà vinavant, ha la polizia chantunala dal Grischun retschertgà l'onn 2007 en 94 mortoris extraordinaris. Tranter quels sa chattan 30 (26) suicidis, 13 (14) accidents da muntogna, 3 (4) accidents da lavina, 2 (1) accidents da skis, 3 (7) accidents da sgol e 4 (3) persunas ch'èn mortas da drogas. Plinavant hai dà 2 (4) accidents da lavur mortals.
Paucas midadas hai er dà tar ils grevs delicts sexuals. Igl èn vegnids denunziads 14 (12) violaziuns, 10 (12) acts sexuals cun uffants e 2 (7) constricziuns sexualas. La gronda part da quests cas è vegnida sclerida.
Tar ils incendis hai dà in augment dad 85 a 93 davent l'onn 2006 a l'onn passà. En 12 (14) cas sa tractavi dad incendiaments. La quota da scleriment da tut ils incendis sa chattava tar 70 (80) pertschient.
In cler augment hai dà tar il commerzi cun cocain e cun heroin, entant ch'il consum da narcotics sa chattava en il rom dals onns precedents.

Dapli accidents da traffic e dapli persunas blessadas
L'onn passà èn capitads en tut 2'667 accidents da traffic sin las vias grischunas. Quai correspunda ad in augment da circa 10 pertschient en cumparegliaziun cun l'onn precedent. Visavi l'onn precedent è il dumber da las persunas blessadas s'augmentà dad 821 a 907. L'onn 2007 han 27 persunas pers lur vita en accidents da traffic en il chantun Grischun. Quai è ina victima main che l'onn precedent.
Il dumber d'accidents da pedunas e da peduns è stà stabil en cumparegliaziun cun l'onn precedent. En egl dettia dentant l'augment d'uffants blessads tranter 0 e 9 onns, ha declerà Robert Willi, il schef da la polizia da regiuns e da traffic. Il dumber saja s'augmentà da 3 ad 11. "4 uffants sajan vegnids blessads da vehichels a motor sin la strivla melna", ha ditg Willi, "4 ulteriurs uffants durant traversar vias senza strivla melna".
La gronda part dals accidents da traffic è capitada er l'onn 2007 durant las fins d'emna, spezialmain las sondas. Areguard las uras dal di hai da ils pli blers accidents da traffic il suentermezdi tard e sur mezdi.
"Ils motivs principals che han chaschunà l'onn 2007 accidents da traffic ston anc adina vegnir attribuids a l'inattenziun ed a la distracziun sco er a la sveltezza betg adattada", ha explitgà Robert Willi.
La statistica criminala e la statistica dals accidents da traffic 2007 pon vegnir consultadas detagliadamain en l'internet sut www.kapo.gr.ch.

Quelle: Kantonspolizei Graubünden
Neuer Artikel