Ils 18 d'avust 2008 cumenza il nov onn da scola en la gronda part da
las vischnancas grischunas. Tschients da scolaras e da scolars cumenzan
la scola quest atun. La polizia chantunala dal Grischun e la polizia da
la citad da Cuira sco er la cassa da malsauns publica (CMP) lantschan er
quest onn in'acziun communabla per il cumenzament da la scola: En
l'entir Grischun vegnan repartidas chapitschas cotschnas a las
scolarinas ed als scolarins da l'emprima classa. Questas chapitschas cun
pala dattan en egl en il traffic sin via e daventan in'attracziun per
las automobilistas e per ils automobilists.
Centrala è la segirezza da las participantas e dals participants da
traffic ils pli giuvens. Il mintgadi da scola vegn a chaschunar intginas
midadas per ils uffants. Tranter auter vegn barattada l'enconuschenta
via da scolina cun ina nova via da scola. Sch'i ston vegnir traversadas
vias sin quella, è quai in grond privel per las pitschnas e per ils
pitschens. La polizia s'engascha ensemen cun la CMP per minimalisar
quests privels ed ella sa stenta da garantir ina via da scola segira.
Quest engaschament serva a la segirezza dals uffants sin lur via da
scola. Cun exercitar situaziuns difficilas en il traffic sin via vegnan
promovidas l'independenza e la confidenza en sasez dals uffants. Quest
trenament en il traffic facilitescha als geniturs da laschar ir lur
uffants a pe a scola. L'acziun vegn sustegnida cun placats "Cumenzament
da scola! Attenziun uffants!" e cun flyers.
Las collavuraturas ed ils collavuraturs da las basas da la polizia
da traffic, dals posts da polizia e da l'instrucziun da traffic vegnan a
survegliar las vias da scola durant las emprimas emnas. Gia la segunda
emna da scola cumenza l'instrucziun da traffic en las scolinas.
La polizia chantunala fa attents tut las participantas e tut ils
participants da traffic a lur funcziun d'exempel. Ils uffants emprendan
il meglier cun imitar. Tuts duessan esser conscients da quest fatg e
contribuir - cun lur agen cumportament - ad ina buna instrucziun da
traffic. Prendai resguard dals uffants en il traffic sin via e manischai
Voss vehichel cun gronda precauziun sin las vias da scola.
Tips per ina via da scola segira
Accumpagnai Voss uffant pliras giadas sin la via da scola u tar il
bus da scola. Na tschernì betg la via la pli curta, mabain la via la pli
segira.
Sche Vus giais a prender Voss uffant, spetgai directamain a la
sortida da la scola e betg da l'autra vart da la via.
Voss uffant duai spetgar tar la strivla melna, fin ch'ils
autos èn sa fermads dal tuttafatg.
Tramettai Voss uffant a temp a scola. Currim e prescha
augmentan la ristga d'accidents.
Laschai ir a scola cun velo Voss uffant pir cur che Vus essas segirs
ch'el vegn a frida cun il traffic e pir cur che la scola e che Vus
chattais quai per bun.
Insisti che Voss uffant portia ina chapellina e la purtai er sez.
Faschai stim che Voss uffant sa fermia, avant che metter pe sin la
via. La devisa "spetgar, guardar, tadlar, chaminar" vala anc adina.
Quelle: polizia chantunala dal Grischun