Navigation

Inhaltsbereich

  • Erste Mitteilung
  • Neuen Beitrag einfügen
Telefonar al guvernagl senza in indriz a maun liber n'è betg mo scumandà, mabain er fitg privlus. Perquai sa participescha la polizia chantunala dal Grischun, ensemen cun auters corps da polizia da la Svizra, a la campagna per la segirezza dal traffic "handy al guvernagl". Las participantas ed ils participants da traffic duain vegnir sensibilisads per quest problem cun agid da campagnas da placats e da dapli controllas correspundentas.

La finamira da la campagna 2008, che vegn manada tras il settember durant circa trais emnas, è quella da reducir il dumber d'accidents da traffic chaschunads tras inattenziun e quai cunzunt pervia da l'utilisaziun da telefons mobils. In'ulteriura finamira da la campagna è quella d'orientar meglier las manischunzas ed ils manischunzs davart la situaziun giuridica. La gronda part da las automobilistas e dals automobilists sa bain ch'igl è scumandà e chastiabel d'utilisar ils telefons mobils al guvernagl. Las pli paucas ed ils pli paucs èn dentant conscients dal fatg, ch'in tal cumportament n'è savens tuttavia betg liquidà cun ina multa disciplinara da 100 francs. Per exempel sch'ina manischunza u sch'in manischunz che telefonescha gist surpassa en greva moda las reglas dal traffic sin via e metta en quest connex en privel autras persunas, vegn applitgada la procedura penala ordinaria.

Era indrizs da telefonar a maun liber pon esser privlus
La campagna duai er demussar la problematica dals indrizs da telefonar a maun liber. Telefonar cun tals indrizs n'è betg scumandà explicitamain en Svizra, uschenavant che la concentraziun sin il traffic na vegn betg reducida. Uschespert che la persuna che manischescha è distratga tras il telefonar, cuntradi ses cumportament a la lescha. La manischunza u il manischunz è obligà da far attenziun a la via ed al traffic. Er quella u quel che telefonescha a maun liber sto star bun per quai, sch'ella u sch'el chaschuna in accident da traffic ubain periclitescha insatgi cun telefonar.

Studis cumprovan ina ristga per la segirezza
Differents studis internaziunals cumprovan che las utilisadras ed ch'ils utilisaders da telefonins èn ina ristga per la segirezza dal traffic sin via. Tgi che telefonescha durant l'ir cun auto è distratg, uschia ch'il privel da reagir fauss u da reagir memia tard en situaziuns criticas crescha. L'orientaziun è restrenschida, il stil da charrar è irregular ed ils sbagls da manischar s'augmentan. Las consequenzas tipicas èn che la manischunza u ch'il manischunz banduna il vial, collidescha da davos u surpassa la precedenza da las pedunas e dals peduns a las strivlas melnas e chaschuna betg sco ultim er collisiuns frontalas mortalas.

Quelle: polizia chantunala dal Grischun
Neuer Artikel