En in rom festiv èn duas polizistas chantunalas ed indesch polizists chantunals vegnids brevetads e saramentads il mardi suentermezdi en la sala dal cussegl grond a Cuira. Ultra da quai èn vegnids saramentads duas polizistas e tschintg polizists, che han midà nà d'auters corps da polizia vi tar la polizia chantunala dal Grischun. Er la cussegliera guvernativa Barbara Janom Steiner, che ha - per l'emprima giada en sia nova funcziun sco scheffa dal departament da giustia, segirezza e sanadad - prendì part a la festa da brevetaziun, ha surdà buns giavischs a las polizistas ed als polizists ch'èn vegnids saramentads da nov.

"L'autoritad da la polizia na sa basa betg en emprima lingia sin armas e sin meds d'intervenziun da polizia", ha ditg Barbara Janom Steiner, "mabain sin la renconuschientscha e sin il consentiment - u ditg cun auters pleds - sin la confidenza da la populaziun." La cussegliera guvernativa ha la finala er engrazià a tut quellas ed a tut quels che han accumpagnà las aspirantas ed ils aspirants sin lur via fin qua e che vegnan a sustegnair ellas ed els er vinavant: las famiglias sco er las amias ed ils amis, e quai er, cur che la chargia è ina giada fitg greva, di Janom Steiner.

"La scola da polizia ad Amriswil n'ha betg mo reunì Vus sco aspirantas ed aspirants da polizia da l'entira Svizra orientala e da ses partenaris da contract. Vus avais isà il banc da scola cun Vossas collegas e cun Voss collegas d'auters corps da polizia", ha declerà Markus Reinhardt, il cumandant da la polizia chantunala dal Grischun. "Da quai èn naschidas colliaziuns che Vus na vulais betg manchentar ina giada pli tard." Dentant haja quai er dà nov anim al concordat da la polizia da la Svizra orientala e la collavuraziun transcunfinala daventia pli simpla, uschia Reinhardt vinavant. Il cumandant da polizia ha giavischà a las aspirantas ed als aspirants ina buna recepziun en il corp da polizia dal Grischun cun il sustegn correspundent da las persunas superiuras e da las camaratas e dals camarats. Suandadas èn la prelecziun da l'empermischun solenna e la brevetaziun sco tala da las novas polizistas e dals novs polizists tras il cumandant da polizia.

Cun referats curts en tut las trais linguas chantunalas han las aspirantas ed ils aspirants guardà enavos sin l'onn passà.
La festa da brevetaziun e da saramentaziun è vegnida enramada tradiziunalamain da la musica da polizia dal Grischun.

Las novas polizistas ed ils novs polizists cun lur anteriurs lieus da domicil e cun lur emprims lieus da staziunament
Anhorn Martin, Roten, post da polizia da Samedan
Dolf Jonas, Says, post da polizia da Savognin
Duschèn Enrico, Küblis, post da polizia da Claustra
Godly Andrea Maini, Zuoz, post da polizia da Castasegna
Gritti Fadri, San Murezzan, post da polizia da Landquart
Grond Michael, Favugn, post da polizia da Lai
Hartmann Claudia, Zizers, post da polizia da Martina
Lunghi Luan, Roveredo, post da polizia da Puschlav
Nold Claudio, Flem, post da polizia da Savognin
Roner Silvan, Samedan, post da polizia da Flem
Schmid Xandra, Riom, post da polizia da Puntraschigna
Tuor Flavio, Rabius, post da polizia da Samedan
Wieser Renato, Zernez, post da polizia da Schiers

Las polizistas ed ils polizists che han midà nà d'auters corps da polizia e ch'èn ussa saramentads tar la polizia chantunala dal Grischun
Cattaneo Davide, Lugano, post da polizia da Schiers
Klaiss Franz, Cuira, post da polizia da Tavau
Kollegger Daniel, Lai, post da polizia da Tavau
Pinchera Manuela, Turitg, post da polizia da Tavau
Von Burg Roger, Basilea, basa da la polizia da traffic da Cuira
Zehnder Silvia, Zug, post da polizia da Tavau
Züger Marcel, Turitg, post da polizia da Claustra

Quelle: Kantonspolizei Graubünden