"Chaus clers fan glisch". Sut quest motto lantscha la polizia chantunala dal Grischun gievgia, ils 27 da november 2008, per la segunda giada il di da la glisch che ha lieu en tut la Svizra. Cun in grond dumber dad acziuns vegnan la polizia da traffic sco er l'instrucziun da traffic a regurdar las participantas ed ils participants da traffic en tut las parts dal Grischun, quant impurtant ch'igl è en il traffic sin via ch'ils vehichels da motor e ch'ils vehichels a duas rodas sajan illuminads correctamain sco er che las pedunas e ch'ils peduns sajan vesaivels.

Cun controllas intenziunadas dal funcziunament da l'illuminaziun e da l'equipament correct dad autos e da vehichels a duas rodas sa drizza la polizia directamain e persunalmain a las participantas ed als participants da traffic. Sut il motto "Chaus clers fan glisch" vegnan ellas ed els envidads da dar pli sapientivamain attenziun a la vesaivladad en il traffic sin via.

L'impurtanza dal fatg ch'ins vegn vesì uschè baud sco pussaivel è fitg gronda per la prevenziun d'accidents. Ina part dals accidents pudess vegnir evitada, sche las manevras da franar e da guntgir vegnissan cumenzadas ad ura. En la stgirezza è quai pussaivel, sche las autras participantas e sch'ils auters participants da traffic vegnan percepids pli baud. La notg è la ristga d'in accident bler pli gronda ch'il di. Igl è evident ch'il vesair e ch'il vegnir vesì èn gist l'enviern - pervia da la stgirezza che dura pli ditg e pervia da las relaziuns meteorologicas - spezialmain impurtants. In avantatg da las mesiras da segirezza è ch'ellas pon vegnir realisadas en moda simpla. Tut las participantas e tut ils participants da traffic, sin rodas u a pe, giuvnas u giuvens, veglias u vegls pon, cun in sforz minimal, prestar lur contribuziun ad in augment da la vesaivladad - cun in grond effect per l'atgna segirezza e per tala da las autras participantas e dals auters participants da traffic.

Quelle: polizia chantunala dal Grischun