La realisaziun da las cunvegnas da Schengen/Dublin cun la UE ils 12. da december 2008 vegn ad avair diversas consequenzas per la populaziun indigena. La finamira da questas cunvegnas cun l'uniun europeica è en emprima lingia da reducir las controllas sistematicas da persunas als cunfins interns per cumplettar la libra circulaziun da persunas. Perquai che quai na duai dentant betg chaschunar in pegiurament da la segirezza interna è vegnì concludì in fasch da mesiras che duain garantir u schizunt rinforzar la segirezza interna.

La plazza aviatica da Samedan daventa in cunfin exteriur da Schengen
Tar questas mesiras tutga per exempel il rinforz da las controllas dal cunfin exteriur da Schengen. Sche las cunvegnas èn en vigur, vegn er il Grischun ad avair in cunfin exteriur da Schengen. Quai è la plazza aviatica da Samedan, sin la quala sa platgan er aviuns che derivan da stadis che na tutgan betg al territori da Schengen. Las controllas correspundentas ha il chantun Grischun surdà al corp da guardias da cunfin (Cgcf).

Access direct al sistem d'infurmaziun da Schengen
Cun l'introducziun dal sistem d'infurmaziun da Schengen (SIS) vegnan la polizia chantunala dal Grischun ed il corp da guardias da cunfin ad avair in access direct a tut las datas d'investigaziun da tut ils stadis commembers da las cunvegnas. Quai simplifitgescha considerablamain la collavuraziun internaziunala.

Collavuraziun pli gronda da la polizia chantunala e dal corp da guardias da cunfin
Per cumpensar las controllas sistematicas da persunas als cunfins che crodan èn vegnidas decididas - en ina cunvegna administrativa tranter la polizia chantunala dal Grischun ed il Cgcf - mesiras, cun las qualas il nivel da segirezza actual po vegnir mantegnì. Il territori da cunfin dal Cgcf è vegnì engrondì sur l'axa dals pass dal Güglia, da l'Alvra e dal Flüela fin a Tusaun, a Claustra ed a Bravuogn. En quest territori è il corp da guardias da cunfin autorisà d'ademplir tschertas incumbensas da la polizia. Uschia pon las guardias da cunfin far per exempel controllas da persunas e dal traffic e chastiar autonomamain simpels surpassaments. Grevas cuntravenziuns vegnan tractadas vinavant da la polizia chantunala. Er patruglias maschadadas cun collavuraturas e cun collavuraturs da la polizia chantunala e dal corp da guardias da cunfin sco er acziuns da controlla cuminaivlas, sco ch'ellas vegnan gia fatgas actualmain, duain vegnir intensivadas en il territori da cunfin engrondì.

Principadi da Liechtenstein
Il principadi da Liechtenstein na sa participescha anc betg al territori da Schengen. Or dal puntg da vista giuridic è il cunfin dal principadi da Liechtenstein pervia da quai in cunfin exteriur da Schengen. Las polizias chantunalas da Son Gagl e dal Grischun sustegnan il Cgcf tar las controllas da la polizia da duana enturn il principadi da Liechtenstein.

Ils posts da cunfin restan occupads / las controllas da duana restan
Perquai che la Svizra n'è betg commembra da l'uniun da duana da la UE vegn il corp da guardias da cunfin anc adina a far controllas da duana. Las guardias da cunfin restan staziunadas tar ils posts da cunfin. Ina controlla da duana è dapli che mo ina controlla da rauba: I sa tracta d'ademplir las incumbensas da la polizia da duana per cumbatter la cuntrabanda (cuntravenziuns en ils secturs da la duana e da la taglia sin la plivalur, da narcotics, d'armas/da material da guerra, da material radioactiv, da la protecziun da spezias e da marcas, da la protecziun da bains culturals e.u.v.), d'investigaziuns da vehichels e da rauba (inclusiv documents engulads u falsifitgads) sco er d'incumbensas da la polizia d'economia, da la polizia fiscala, da la polizia da commerzi, da la polizia da mastergn e da la polizia da sanadad. Quests secturs na vegnan betg tangads da Schengen. La basa legala resta sco ch'ella è e l'activitad da controlla resta la medema. Mintga mument da la controlla da duana (dentant betg en moda sistematica) è la guardia da cunfin autorisada da pretender il document da legitimaziun per extrair da quel infurmaziuns ch'èn necessarias per la controlla da duana per segirar a sasez u pervia d'in suspect inizial polizial ch'è tuttenina avant maun. En quest rom dastgan vegnir consultads - sche quai fa da basegn - tut ils sistems d'infurmaziun da la polizia e da la polizia da persunas estras. Controllas da duana dastgan vegnir fatgas - er cun Schengen - en tut la Svizra (er a l'intern dal pajais). Là, a l'intern dal pajais, pon ellas vegnir cumbinadas cun ina controlla da persunas intenziunada.

Pia dastga il Cgcf far vinavant controllas da la polizia da duana e controllas da la polizia da cunfin en tut la Svizra.

Quelle: Kantonspolizei Graubünden und Grenzwachtkorps III