La fin d'avrigl vegnan puspè purschids curs da moto en il center per la segirezza stradala DrivingGraubünden a Cazas sut il patrunadi dal Touring club da la Svizra (TCS) e da la polizia chantunala dal Grischun. Cun passa 120 participantas e participants han quests curs, ch'èn vegnids realisads l'onn passà per l'emprima giada, chattà in grond interess.

Perquai che l'interess per quest curs d'in di, che vegn sustegnì finanzialmain dal cussegl da la segirezza stradala e dal TCS, è stà uschè grond l'onn 2008, ha el lieu tschintg giadas quest onn e betg mo trais giadas sco l'onn passà. Il curs custa 100 francs per persuna (incl. gentar). Ins po s'annunziar directamain tar DrivingGraubünden, telefon 081 632 30 30 u www.drivinggraubuenden.ch. Las annunzias vegnan resguardadas tenor la successiun da lur entrada. Il di da curs vegn terminà cun in certificat.

La segirezza stradala da las motociclistas e dals motociclists è in tema central tar la polizia chantunala dal Grischun. L'intensitad dal traffic che crescha ad in crescher è in grond factur da ristga. Vesair las ristgas en il traffic sin via e reagir correctamain en situaziuns da privel, quai è ina chaussa ch'è d'emprender. Sin ils indrizs segirs da DrivingGraubünden a Cazas e sut la surveglianza professiunala d'instructurs emprendan las participantas ed ils participants ad ir cun moto en ina moda sportiva e segira, betg dentant en ina maniera da cursa.

Datas dals curs:
dumengia, ils 26 d'avrigl 2009
dumengia, ils 3 da matg 2009
venderdi, ils 8 da matg 2009
dumengia, ils 17 da matg 2009
gievgia, ils 4 da zercladur 2009