En in rom festiv èn ina polizista chantunala ed indesch polizists chantunals vegnids brevetads e saramentads il venderdi suentermezdi en la sala dal cussegl grond a Cuira. Ultra da quai èn vegnids saramentads dus polizists che han midà nà d'auters corps da polizia vi tar la polizia chantunala dal Grischun.

"L'autoritad da la polizia na sa basa betg en emprima lingia sin armas e sin meds d'intervenziun da polizia", ha ditg la cussegliera guvernativa Barbara Janom Steiner, scheffa dal departament da giustia, segirezza e sanadad, "mabain sin la renconuschientscha e sin il consentiment – u ditg cun auters pleds – sin la confidenza da la populaziun." In engraziament spezial ha la cussegliera guvernativa er drizzà a las famiglias, a las amias ed als amis da la brevetada e dals brevetads per il sustegn ch'ellas e ch'els han prestà er en muments, cur ch'il squitsch è stà spezialmain grond.

En ses discurs ha il cumandant da la polizia chantunala dal Grischun, Markus Reinhardt, rendì attent al senn da l'empermischun da servetsch che la nova polizista e ch'ils novs polizists han dà sur la bandiera da la polizia chantunala dal Grischun durant la festa. "Questa empermischun duai As accumpagnar ed obligar en Voss servetsch sco polizista u sco polizist ed a medem mument er definir Vossa incumbensa", uschia Reinhardt. L'empermischun oblighescha tranter auter las polizistas ed ils polizists da respectar la constituziun e las leschas, da mantegnair discreziun davart funcziuns e davart percepziuns da servetsch sco er da resguardar e da proteger ils dretgs da las burgaisas e dals burgais.

Il cumandant da polizia giavischa a l'aspiranta ed als aspirants ina buna recepziun en il corp da polizia dal Grischun. "Las emprimas impressiuns", uschia il cumandant da polizia, "vegnan ad esser decisivas per Vossa activitad futura. Las tractai pervia da quai cun quità e n'As laschai guidar ni da pregiudizis ni da famas."

La festa da brevetaziun e da saramentaziun è vegnida enramada tradiziunalmain da la musica da polizia dal Grischun.

La nova polizista ed ils novs polizists cun lur emprims lieus da staziunament

Martina Kessler, post da polizia da Scuol

Corsin Farrér, basa da la polizia da traffic da Cuira

Robin Arpagaus, basa da la polizia da traffic da Tusaun

Mario Caderas, post da polizia da Mustér

Stefan Meier, basa da la polizia da traffic da San Bernardin

Renzo Lucini, post da polizia da Roveredo

Florian Hunger, post da polizia da Samedan

Andy Meier, post da polizia da Martina

Silvio Chiesa, post da polizia da Val Müstair

Diego Camenisch, basa da la polizia da traffic da Tavau

Curdin Jäger, post da polizia da Tavau

Markus Marugg, post da polizia da Casti

Ils polizists che han midà nà d'auters corps da polizia e ch'èn ussa saramentads tar la polizia chantunala dal Grischun

Stefan Döderlin, basa da la polizia da traffic da Tusaun

Markus Meyer, post da polizia da Martina