Er l'onn passà èn passa 80 pertschient dals accidents da moto en il chantun Grischun vegnids chaschunads da las motociclistas e dals motociclists sezs. Per la polizia chantunala dal Grischun in motiv suffizient per cuntinuar er quest onn cun sia lavur da prevenziun cumprovada.

Tranter il matg e l'october èn – sco segn exteriur da la campagna – puspè montads placats per lung dals trajects da moto ils pli frequentads. Er las reclamas vegnan puspè mussadas en la televisiun ed en ils kinos da la regiun. Cun acziuns sistematicas vegnan las motociclistas ed ils motociclists rendids attents en tut il chantun Grischun als privels zuppads, dentant er a las pussaivladads da prevegnir ad accidents. A chaschun da questas acziuns vegn tschertgà il discurs cun las motociclistas e cun ils motociclists e vegnan repartidas broschuras cun cussegls utils. L'emprima acziun ha lieu sonda, ils 23 da matg. La campagna da prevenziun ha la finamira da reducir vinavant il dumber d'accidents da moto, per che las motociclistas ed ils motociclists possian giudair las bellas varts dal motociclissem.

Ils accidents n'han betg adina ils medems motivs. Il pli savens è dentant ina sveltezza memia auta la raschun. Ina "sveltezza memia auta" po er signifitgar ch'ins sa mova anc entaifer las limitas da sveltezza permessas, ma che quella sveltezza na correspunda betg a la caracteristica da la ruta ed a las abilitads da manischar. Las consequenzas d'in accident da moto èn il pli savens bler pli grevas per las motociclistas e per ils motociclists che las consequenzas d'in accident d'auto. Per las motociclistas e per ils motociclists èsi pia d'impurtanza existenziala ch'ellas e ch'els guidian lur moto en moda prospectiva e tegnian er quint d'in cumportament malprecaut d'autras participantas e d'auters participants da traffic.