Grischun: La polizia chantunala avertescha cunter engianaders che sa dattan da biadi
En la Svizra da l'ost ha la polizia dapi il favrer 2009 puspè registrà dapli annunzias pervia d'uschenumnadas engianadras e pervia d'uschenumnads engianaders che sa dattan da biadia u da biadi. Entant che blers cas èn restads mo emprovas, han las engianadras ed ils engianaders piglià dapi il cumenzament da l'onn 2009 en otg delicts ch'èn capitads mo a Turitg totalmain passa 500'000 francs. En il chantun Grischun n'èn anc betg vegnids enconuschents tals delicts durant quest onn. L'onn passà èn vegnids annunziads ventg delicts. Cun in'excepziun èn quai dentant mo stadas emprovas d'engianar.
In proceder raffinà da las engianadras e dals engianaders
Las victimas ch'èn per gronda part pli attempadas vegnan contactadas per telefon. Cun interrogar en ina moda inschignusa vegni simulà ch'ina parenta u ch'in parent saja actualmain en ina situaziun d'urgenza. Cun salidar "hallo, engiavina tgi che ta telefonescha" ubain cun dir "ti m'enconuschas bain" u sumegliantas chaussas vegnan las victimas involvidas en in discurs che ha lieu il pli savens en bun tudestg. En il decurs d'in tal discurs emprovan las engianadras u ils engianaders da survegnir in emprest en daners. En moda persvadenta pretendan ellas ed els d'avair cumprà proprietad d'abitar e supplitgeschan d'emprestar grondas summas da daner blut. Cun ulteriurs cloms da telefon vegn rinforzà il squitsch sin las victimas ed ellas vegnan sfurzadas da retrair imports pli gronds da lur instituts da daners. L'enconuschenta u il parent presumptiv è alura andetgamain impedì ed incarichescha ina "persuna da confidenza" da vegnir per ils daners.
Blers da quests delicts restan emprovas, perquai che las victimas perdan la confidenza. Ma sche las engianadras e sch'ils engianaders survegnan daners, fan ellas ed els savens svanir tut ils respargns da la victima. Il dumber zuppà da tals delicts vegn valità sco aut.
Uschia pudais Vus As proteger cunter engianadras e cunter engianaders che sa dattan da biadia u da biadi
Sche Vus duessas vegnir involvida u involvì en in tal discurs da telefon, n'As laschai betg tementar. Na prendai mai la decisiun da retrair daners senza consultar ina stretga parenta u in stretg parent ubain ina persuna enconuschenta, p.ex. ina buna vischina u in bun vischin. Infurmai a medem temp la polizia ed As laschai cussegliar da la polizia, tge che Vus duessas far en il cas concret. Uschia essas Vus protegida u protegì cunter las engianadras e cunter ils engianaders che sa dattan da biadia u da biadi.