Onn per onn daventan bleras viandantas e blers viandants las victimas da ladernitschs, d'assagls u d'enguladitschs impertinents. Cunzunt las persunas che fan vacanzas en Italia, en Spagna ed en Frantscha rapportan adina puspè da tals abus.

Las "pli bellas emnas da l'onn" vuless mintgina e mintgin giudair en ruaus, senza quitads e natiralmain senza problems. Il post spezialisà "prevenziun" da la polizia chantunala dal Grischun dat buns cussegls, co che Vus pudais As proteger cunter nauschas surpraisas.

È tut serrà?

Serrai bain las fanestras e las portas avant che Vus bandunais Vossa chasa e n'avisai betg Vossa absenza mettend indicaziuns u notizias vi da l'isch-chasa.

Ina chascha da brevs tgemblada lascha percorscher Vossa absenza.

Pudais Vus dar aua a mias fluras?

Ina buna cuminanza dat segirezza. In agid da buna vischinanza po impedir enguladitschs. Activitads sco dar aua a las fluras, svidar las chaschas da brevs, s'occupar da l'abitaziun ed uschia vinavant signaliseschan preschientscha. Profitai da la confidenza vicendaivla da Vossas vischinas e da Voss vischins.

Segir en viadi!

Autos bain chargiads èn adina e dapertut ina preda carmalanta. In'attenziun speziala è dumandada sin las plazzas da parcar e da pussar a l'exteriur. Na laschai betg or d'egl Voss vehichel. Cun dumandar cussegl u agid, cun demolir intenziunadamain Voss auto e cun ulteriurs trics emprovan las ladras ed ils laders adina puspè da motivar Vus da bandunar Voss auto. N'As laschai betg engianar, sajas prudents e bandunai Voss auto mo, sche Vus essas segirs.

Finalmain arrivads!

Deponi Voss meds da pajament e Voss documents da viadi en il tresor da l'hotel u tar l'administraziun da chasas da vacanzas. Prendai cun Vus mo ils daners che Vus duvrais per in di. Per As proteger cunter brigantas e cunter brigants motorisads, purtai Vossas tastgas e Vossas cameras cun bindels enturn la spatla e las encugnai sut il bratsch da la vart opposta dal vial. Stgamiai Voss daners mo en instituts da daners.

La polizia chantunala dal Grischun giavischa a Vus tuttas ed a Vus tuts bellas vacanzas recreativas.