L'instrucziun da traffic da la polizia chantunala dal Grischun ha dastgà prender encunter avant curt in char annex cun in parcours d'inschign che cuntegn elements d'exercizi interessants. Uschia po vegnir erigì in parcours da velo mobil. Ils exercizis èn orientads a las pretensiuns d'ina velocipedista u d'in velocipedist en il traffic quotidian sin via.

Uffants cumenzan ozendi fitg baud ad ir cun velo. Gia mintga segund uffant en la vegliadetgna da quatter onns charrescha cun in velo senza pedals u cun in velo per uffants. Uffants en la vegliadetgna da la scola primara sa participeschan gia dapli al traffic sin via. Els vulan sa muventar; quai è lur natira. Cunfins èn gist uschè necessaris sco la libertad da sa mover entaifer quels cunfins. En spezial il gieu cun la ballantscha è immens impurtant per in svilup saun. Abilitads motoricas e spiertalas èn stretgamain colliadas ina cun l'autra.

Cumplettaziun tar l'instrucziun da traffic
Il parcours d'inschign è ina cumplettaziun utila ed orientada a la pratica tar l'instrucziun da traffic usitada en scola e tar l'instrucziun pratica en il curtin da traffic. El sa lascha per exempel eriger entaifer curt temp sin las plazzas da scola e po vegnir adattà a la grondezza da las relaziuns da spazi avant maun. Il elements d'exercizi interessants e variads stgaffeschan situaziuns sco ellas èn da chattar en il traffic sin via. Questas situaziuns pon dentant vegnir trenadas senza privel en l'ambient d’exercizi. Cun ina concurrenza che vegn realisada cun in fegl da valitaziun vegn la motivaziun da las participantas e dals participants augmentada.

Er per auters corps da polizia e per autras persunas d'instrucziun
Per l'instrucziun da traffic dal chantun Grischun è il char annex cun il parcours d'inschign in med d'acziun fitg adattà ed impurtant che po vegnir applitgà per nossa giuventetgna adolescenta cun niz e cun divertiment. Ultra da quai èsi pussaivel da metter a disposiziun il char annex ad auters corps da polizia ed ad autras persunas d'instrucziun interessadas. Per la realisaziun dal char annex cun parcours e per il sustegn finanzial engrazia l'instrucziun da traffic da la polizia chantunala dal Grischun cordialmain a las suandantas sponsuras ed als suandants sponsurs: al touring club da la Svizra (TCS), a la secziun TCS dal Grischun ed al fond per segirezza dal traffic (FVS).

Nov parcours d'inschign per la polizia chantunala dal Grischun (d.s.): Rodolfo Plozza, Martin Roffler, Daniel Tscholl, Jon Prevost