Sut il motto "Segirezza per tuts" fa il post spezialisà per la prevenziun da la polizia chantunala grischuna ina tura da cussegliaziun tras tut il chantun durant las proximas duas emnas. El sa ferma en las vischnancas da San Murezzan, da Scuol, da Tavau Plaz, da Tusaun, da Cuira, da Landquart, da Glion e da Savognin.

Cun in mobil da segirezza cun in equipament spezial, cun duas tendas e cun numerus material da documentaziun visita il post spezialisà per la prevenziun la populaziun dal Grischun. Questa tura stat sut il motto "Segirezza per tuts" e duai mussar a persunas ch'èn interessadas vi da la segirezza, co che infracziuns pon vegnir difficultadas u impedidas. Per quest intent cuntegna il mobil da segirezza differents exponats ed exempels da pussaivladads da sa proteger cunter infracziuns. Ils dus spezialists dal post spezialisà per la prevenziun, Theo Wasescha e René Schuhmacher, respundan dentant er dumondas davart ils temas sco violenza a chasa, criminalitad en l'internet, segirezza en la vegliadetgna, prevenziun da toxicomania u violenza da giuvenils.

Render enconuschent il servetsch da giuvenils
Sin la tura da segirezza vegn preschentà a la populaziun er il servetsch da giuvenils che ha cumenzà cun sia lavur il mars da quest onn. Placats d'infurmaziun ed in flyer infurmeschan tge ch'ins chapescha sut criminalitad da giuvenils e co ch'il servetsch da giuvenils sustegna giuvenils sco er lur geniturs e las persunas cun la pussanza dals geniturs. Ultra dals dus collavuraturs dal post spezialisà per la prevenziun vegnan ad esser preschents en mintga vischnanca supplementarmain er collavuraturas e collavuraturs dals posts da polizia respectivs che enconuschan las relaziuns localas. Uschia vegn garantida l'entira paletta da las incumbensas da la polizia e la populaziun po s'infurmar al lieu. L'exposiziun che tracta il tema da la segirezza è averta mintgamai senza interrupziuns da las 9.00 fin las 17.00 (ils 4 da zercladur fin las 19.00, ils 5 da zercladur fin las 16.00). Las cussegliaziuns èn gratuitas.

Visitads vegnan ils suandants lieus:
glindesdi, ils 31 da matg 2010 San Murezzan plazza davant il Coop dal bogn
mardi, il 1. da zercladur 2010 Scuol entrada dal Bogn Engiadina
mesemna, ils 2 da zercladur 2010 Tavau Plaz plazza da la posta, tar il "Bubenbrunnen"
gievgia, ils 3 da zercladur 2010 Tusaun plazza davant la Migros
venderdi, ils 4 da zercladur 2010 Cuira plazza da la staziun
sonda, ils 5 da zercladur 2010 Cuira plazza da la staziun
glindesdi, ils 7 da zercladur 2010 Landquart staziun
mardi, ils 8 da zercladur 2010 Glion staziun
mesemna, ils 9 da zercladur 2010 Savognin Savognin turissem