Navigation

Inhaltsbereich

  • Erste Mitteilung
  • Neuen Beitrag einfügen
"Distratg – e la mort t'accumpogna". Uschia sa cloma la campagna atunila da prevenziun cunter accidents da traffic. La campagna cumenza ils 24 da settember e dura in mais. Inattenziun e distracziun èn la raschun per circa mintga terz accident da traffic en il chantun Grischun. Ultra da la sveltezza betg adequata e da l'alcohol al guvernagl è quai in dals motivs principals per accidents da traffic sin nossas vias. Per ils schefs da las polizias da traffic da la Svizra orientala è quai stà in motiv avunda per lantschar questa campagna ch'è vegnida preschentada a las medias la gievgia a Cuira. Ultra da la polizia da la citad da Cuira e da la polizia chantunala dal Grischun vegn questa campagna purtada da numerus auters corps da la Svizra orientala.


L'onn passà han ils corps da polizia da Turitg (polizia chantunala, polizia da la citad e polizias communalas) sco er ils corps da polizia dal concordat da polizia da la Svizra orientala concludì d'extender las campagnas annualas per la segirezza dal traffic sin l'entira Svizra orientala. "La collavuraziun pli stretga cun campagnas communablas portan en spezial ils suandants avantatgs: cun sa preschentar communablamain e cun duvrar ils medems meds e las medemas mesiras da communicaziun duai d'ina vart vegnir augmentà l'effect da las campagnas en l'entira Svizra orientala e vegnir intermediada la medema missiva a tut las participantas ed a tut ils participants da traffic", ha ditg Ueli Caluori, cumandant da la polizia da la citad da Cuira. Da l'autra vart possian ins reducir considerablamain ils custs da mintga corp da polizia per producir ils meds da communicaziun, ha cuntinuà Caluori. Caluori presidiescha la conferenza dals schefs da las polizias da traffic da la Svizra orientala, ch'è tranter auter cumpetenta per chattar ils temas da las campagnas annualas da prevenziun.


Er mangiar persics è ina distracziun
Hansjürg Frehner, schef da traffic da la polizia chantunala dal Grischun, ha suttastritgà cun cifras e cun fatgs impressiunants, quant privlus ch'igl è, sch'ins vegn distratg al guvernagl en x-ina moda e maniera. La campagna tematisescha cunzunt la distracziun tras telefonar u tras programmar ils apparats da navigaziun. Dentant betg mo. "Tgi che mangia per exempel in persic savurus durant ch'el maina in vehichel, e guarda da betg far tacs e flatgs, na vesa betg, tge che capita davant el sin via", uschia Frehner. El haja pli ditg, fin ch'el haja puspè sut controlla il guvernagl e possia manischar en moda precisa, ha Frehner explitgà vinavant.

Meds da communicaziun unitars en l'entira Svizra orientala
Ultra da controllas da traffic sistematicas en l'entir territori vegn la campagna accumpagnada da meds da communicaziun unitars. En numerus lieus vegnan pendids placats che mussan ina dunna che telefona ed in um che programmescha ses apparat da navigaziun. Davosvart sin ils placats vesan ins ina figura vestgida en nair che tegna en maun ina fautsch. Questa figura simbolisescha la mort sco passagier. Ultra da l'acziun da placats vegnan emess spots sur diversas staziuns localas da radio, ed a chaschun da lur controllas han las polizistas ed ils polizists er cun sai cartas cun differents motivs davart il tema. Questas cartas pon vegnir duvradas per trametter salids u er sco tatgaders. Sco sin ils placats è la mort passagiera er sin las cartas.

Telefonierende Frau am Steuer


Navigationsgerät programmierender Mann während der Fahrt

Neuer Artikel