L'ultim temp è la polizia chantunala dal Grischun vegnida rendida attenta diversas giadas da burgaisas e da burgais preoccupads ch'ellas e ch'els hajan survegnì e-mails cun in cuntegn fraudulent. I vegn recumandà urgentamain da betg reagir sin tala posta electronica.

En circulaziun èn actualmain dus differents tips dad e-mails. Ina giada vegni communitgà a la retschavidra u al retschavider ch'ella u ch'el haja chargià giu illegalmain datotecas da musica ed haja violà uschia ils dretgs d'autur. Per impedir che la procura publica instradeschia ina inquisiziun u per evitar malempernaivladads sco ina perquisiziun da la chasa u in termin davant dretgira duessan ins cumprar ina uschenumnada carta UKASH d'ina valur da 100 euros e trametter ses PIN ad ina tscherta adressa dad e-mail. UKASH è ina pussaivladad da pajar en l'internet.

Controllar il conto sur in link
En cas dal segund gener dad e-mail fraudulent vegn la retschavidra u il retschavider intimà da controllar sias indicaziuns en il conto da PayPal (er ina pussaivladad da pajar en l'internet). Per quest intent vegn inditgà in link ad ina pagina d'internet che vesa ora precis sco la pagina d'internet da PayPal. Davostiers sa zuppa però ina pagina d'internet da fraud.

Betg avrir agiuntas, betg suandar hyperlinks
La polizia chantunala dal Grischun recumonda a retschavidras ed a retschaviders da tals e-mails u dad e-mails sumegliants da stizzar quels immediatamain. Precauziun è dumandada en spezial, sche la novitad deriva d'ina adressa d'ina speditura u d'in speditur nunenconuschent u sch'ella dumonda in'acziun da la retschavidra u dal retschavider (suandar in hyperlink, avrir in'agiunta, inditgar tschertas datas persunalas/datas dal conto e.u.v.). Cunter tals mails da spam u da phishing na pon ins betg sa proteger cun ina segirezza absoluta. Impurtant èsi però ch'il sistem operativ dal computer e che las applicaziuns sco ils programs da protecziun cunter virus vegnian tegnids cun updates regulars sin il stan il pli actual. La persecuziun da las auturas e dals auturs da tals e-mails è fitg difficila, perquai ch'ellas ed els ageschan sut in num fauss u nà da l'exteriur.

Ulteriuras infurmaziuns ed avertiments actuals survegnis Vus tar la centrala d'annunzia e d'analisa per la segirezza da l'infurmaziun da la confederaziun MELANI sut www.melani.admin.ch