Navigation

Inhaltsbereich

  • Erste Mitteilung
  • Neuen Beitrag einfügen
Ensemen cun differentas organisaziuns partenarias tschertga la polizia chantunala dal Grischun il matg per l'emprima giada la motociclista u il motociclist da l'onn. Ella vul far quai sin l'areal dal center per la segirezza stradala DrivingGraubünden a Cazas. Questa occurrenza sa numna "Biker-Prävi-Days 2011" ed è ina part integrala da la campagna da prevenziun che la polizia chantunala dal Grischun fa mintga onn per reducir accidents da motos.

L'occurrenza ha lieu la fin d'emna dals 14 e dals 15 da matg 2011, independentamain da l'aura. Las participantas ed ils participants ston absolver senza sbagls noss percurs da segirezza e respunder a dumondas che han da far cun la prevenziun d'accidents da moto. Las meglras participantas ed ils megliers participants da tuts dus dis pon sa participar a l'eliminaziun finala da la dumengia. Da gudagnar datti premis en la valur totala da 3000 francs. Enritgida vegn questa occurrenza da diversas activitads accumpagnantas sco girar tras curvas per mintgina e per mintgin, stans d'infurmaziun e referats specifics che han da far cun il tema da la prevenziun. En la tenda da festa vegni ultra da quai a dar la sonda saira ina festa cun in trategniment musical per las motociclistas e per ils motociclists, ina uschenumnada biker-party, e la dumengia avantmezdi in ensolver grond, in uscheditg biker-brunch. Per il punct culminant musical vegn a procurar la dumengia suentermezdi la gruppa "Da Sign & The Opposite", ch'ins enconuscha da la reclama a la televisiun "Slow down, take it easy".

Numerusas organisaziuns partenarias pussibiliteschan questa occurrenza
Ultra da la polizia chantunala dal Grischun ch'è l'organisatura principala sa participeschan las suandantas instituziuns a la planisaziun ed a la realisaziun dals emprims "Biker-Prävi-Days":
• DrivingGraubünden, center per la segirezza stradala a Cazas
• FM scola da manischar Mannhard Turitg
• Motor-Presse, redacziun TÖFF
• fond per la segirezza dal traffic Berna
• assicuranzas AXA Winterthur
• infurmaziun dals giasts Viamala
• Guardia aviatica svizra da salvament Rega
• agid stradal Cuira
• institut svizzer d'assicuranza d'accidents SUVA
• POLO vestgadira da moto Svizra
• post da medias da la Motosuisse
• post da consultaziun svizzer per la prevenziun d'accidents ppa
Neuer Artikel