L'ultim temp èn daventads publics en il Grischun singuls cas d'engions cun bancomats. Ils delinquents han empruvà cun diversas metodas da survegnir daners, ils codes da PIN u infurmaziuns da las cartas da banca. La polizia chantunala dal Grischun recumonda d'esser fitg precaut.

A plirs lieus en il chantun èsi vegnì constatà che bancomats èn vegnids preparads. Uschia è per exempel vegnida montada ina cuvrida supplementara avant la bucca per inserir la carta per copiar las datas da la carta giu da la strivla magnetica. Quest proceder che vegn numnà "skimming" pussibilitescha da far ina copia da la carta da bancomat. Cun ina camera zuppada po alura vegnir eruì il code da PIN che tutga tiers. Tgi ch'è en possess da la carta copiada e dal code respectiv po alura retrair daners da contos esters. Auters apparats èn vegnids preparads uschia ch'ils daners n'han betg pudì vegnir distribuids. Suenter che la persuna che ha vulì retrair daners è s'allontanada han ils delinquents montà davent l'indriz bloccant ed han engulà ils raps.

Disturbà tar la retratga da daners
Ina terza metoda han demussà persunas ch'èn sa drizzadas a persunas ch'èn stadas londervi a retrair daners e che las han disturbadas uschia. En quest mument èsi reussì ad in cumplizi d'engular la carta u ils daners bluts ch'èn gista vegnids retratgs da la persuna respectiva. La polizia chantunala dal Grischun recumonda pervia da quai da na sa laschar disturbar durant il retrair daners e da controllar l'automat da daners avant che al duvrar. Uschia pon vegnir scuvrids apparats manipulads u cameras zuppadas. Sch'il code dal PIN persunal vegn endatà, stuess quai plinavant – saja quai vi dal bancomat u en cas d'in pajament cun carta en ina fatschenta – vegnir cuvrì cun il maun.

Annunziar observaziuns
Persunas che fan observaziuns en connex cun "skimming" u cun engions cumparegliabels vegnan supplitgadas d'annunziar quai immediatamain al proxim post da polizia u a la centrala d'alarm e d'acziuns da la polizia chantunala dal Grischun (telefon 081 257 79 67). I duess er vegnir annunzià, sch'i vegnan remartgadas persunas che sa cumportan en vischinanza directa d'in bancomat en ina moda che dat en egl.