Navigation

Inhaltsbereich

  • Erste Mitteilung
  • Neuen Beitrag einfügen
Sin las vias dal Grischun hai dà l'onn passà main accidents da traffic che l'onn 2010. Er il dumber da las persunas blessadas e da las persunas ch'èn mortas è sa reducì. Quai resorta da la statistica dals accidents da traffic 2011 ch'è vegnida preschentada mesemna avantmezdi a Cuira a chaschun d'ina conferenza da medias.

"La statistica dals accidents da traffic n'è betg vegnida fatga mo pervia da la statistica", ha accentuà cusseglier guvernativ Christian Rathgeb, schef dal departament da giustia, segirezza e sanadad, en ses pled introductiv. Anzi, la statistica saja qua per infurmar la publicitad davart la situaziun da traffic en il chantun Grischun, ha cuntinuà Rathgeb. "Ultra da quai metta la polizia chantunala dal Grischun ses accents – en il sectur da la prevenziun d'accidents en il traffic sin via – sin fundament da las enconuschientschas da la statistica."

Nagins accidents mortals da pedunas e da peduns sin strivlas melnas en il Grischun
Da las persunas disgraziadas sin strivlas melnas sajan – tar 15 accidents en il chantun Grischun – 8 persunas blessadas levamain e 5 grevamain, ha declerà Hansjürg Frehner, schef da la polizia da traffic dal Grischun. "Per fortuna n'hai betg dà accidents mortals en cumparegliaziun cun la tendenza en il rest da la Svizra."


Passa 30 pertschient damain accidents cun selvaschina
En cumparegliaziun cun l'onn 2010 èn sa reducids ils accidents cun selvaschina per passa 30 pertschient. "Quai resulta senza dubi da las pitschnas quantitads da naiv e – collià cun quai – da la purschida da nutriment per la selvaschina en il guaud", ha commentà Frehner questa cifra. Medemas sajan restadas las uras, en las qualas capitan la gronda part dals accidents. I saja evident che la selvaschina na vegnia strusch periclitada dal traffic sin via durant il di, ha cuntinuà Frehner.

Passa 70 pertschient dals accidents da moto capitan per atgna culpa
"Anc adina èn tar passa 70 pertschient dals accidents da moto las motociclistas ed ils motociclists sezs la culpa", ha ditg Frehner. En cumparegliaziun cun l'onn precedent na sajan il dumber dals accidents da moto e pia er il dumber da las motociclistas e dals motociclists blessads praticamain betg sa midads. "En questa categoria d'accidents avain nus deplorablamain er puspè stuì constatar in augment da las persunas grevamain blessadas", ha cuntinuà Frehner. A questa tendenza vegni fatg frunt tranter auter er cun il di da prevenziun d'accidents da moto dals 3 da zercladur 2012, l'uschenumnà "Biker-Prävi-Day".

La statistica detagliada dals accidents da traffic dal chantun Grischun po vegnir consultada en l'internet sin www.kapo.gr.ch.
Neuer Artikel