Navigation

Inhaltsbereich

  • Erste Mitteilung
  • Neuen Beitrag einfügen

En paucs dis cumenza il nov onn da scola en il chantun Grischun. Per blers uffants che van per l'emprima giada a scolina u en l'emprima classa cumenza ina nova part da lur vita. La polizia chantunala dal Grischun metta gronda paisa sin vias da scola segiras e supplitgescha las participantas ed ils participants dal traffic da prender correspundentamain resguard.

L'emprima emna da scola vegnan las instructuras ed ils instructurs da traffic da la polizia a render attent ils uffants als privels en il traffic sin via ed a mussar ad els co ch'els sa deportan endretg sco peduns. Tut ils uffants da l'emprima classa survegnan er quest onn puspè – en collavuraziun cun l'assicuranza da malsauns CMP – las chapitschas cotschnas stimadas, cun las qualas els dattan en egl en il traffic sin via. Ultra da quai vegnan fatgas las proximas emnas dapli controllas da la sveltezza en ils conturns da chasas da scola e da scolinas.

En paucs dis cumenza il nov onn da scola en il chantun Grischun

Nova campagna "Stop avant la botta"

Dapi in pèr onns fa la polizia, sustegnida dal Touring club da la Svizra (TCS) e dal post da consultaziun svizzer per la prevenziun d'accidents (ppa), ina campagna da sensibilisaziun per il cumenzament da la scola. Quest onn porta quella il titel "Stop avant la botta".

A maun d'ina figura da playmobil en furma d'in polizist vegnan las automobilistas ed ils automobilists supplitgads da betg mo retardar lur vehichel davant ina strivla melna, mabain d'al franar dal tuttafatg. En l'instrucziun da traffic emprendan ils uffants numnadamain da traversar la via pir, cur che las rodas d'in auto na sa movan betg pli. Quai na san bleras automobilistas e blers automobilists betg e perquai rodlan els savens plaun plaun vers ina strivla melna e fan in segn cun il maun u cun las glischs da traversar la via. Perquai che uffants na san anc betg stimar correctamain distanzas e sveltezzas, èsi impurtant che las manischunzas ed ils manischunzs frainian adina dal tuttafatg lur vehichel.

Tips per ina via da scola segira

Er ils geniturs pon contribuir lur part ad ina via da scola segira:

  • Planisai la via da scola ensemen cun Voss uffant.
  • Tramettai Voss uffant a temp a scola. Currim e prescha augmentan la ristga d'accidents.
  • Spetgai directamain a la sortida da la scola, sche Vus giais a prender Voss uffant. Na stai betg da l'autra vart da la via, perquai che l'uffant, sch'el As vesa, na guarda betg pli sin il traffic sin via.
  • Faschai stim che Voss uffant sa fermia dal tuttafatg, avant che metter pe sin la via. Il motto enconuschent "Spetgar – guardar – tadlar – chaminar" vala anc adina!
  • Laschai ir a scola cun velo Voss uffant pir cura che Vus essas segirs ch'el vegn a frida cun il traffic e pir cura che la scola e cura che Vus chattais quai per bun. Insisti che Voss uffant portia ina chapellina da velo.
Neuer Artikel