Navigation

Inhaltsbereich

  • Erste Mitteilung
  • Neuen Beitrag einfügen
Sin las vias dal Grischun èn capitads l'onn passà var 20 pertschient accidents da traffic dapli che anc l'onn precedent. Percunter è sa reducì il dumber da persunas blessadas. L'augment dals accidents sto vegnir valità cun precauziun, cunquai che quel sto vegnir attribuì cunzunt a la nova endataziun dals accidents cun selvaschina. La statistica dals accidents da traffic 2012 è vegnida preschentada da la polizia chantunala dal Grischun la mesemna avantmezdi a Cuira.

"La statistica dals accidents da traffic ans serva sco basa per il diever da las resursas, per che quellas vegnan impundidas anc pli sistematicamain là, nua che accidents pon vegnir cumbattids cun success", ha ditg Hansjürg Frehner, schef da la polizia da traffic dal Grischun. Da princip saja il dumber d'accidents stà pli u main stabil ils ultims onns. "Il grond augment dal dumber d'accidents da l'ultim onn è d'attribuir al fatg ch'ils guardiaselvaschinas registreschan da nov sezs il dumber d'accidents cun selvaschina", relativescha Frehner l'augment. Ils accidents cun selvaschina chaschunads da persunas nunenconuschentas sajan ussa medemamain vegnids registrads, quai che haja fatg crescher andetgamain il dumber d'accidents. Il cusseglier guvernativ Christian Rathgeb, schef dal departament da giustia, segirezza e sanadad, ha medemamain constatà ch'il dumber d'accidents saja restà stabil ed il dumber da persunas blessadas saja schizunt sa reducì. "En vista al volumen da traffic ch'è s'augmentà marcantamain è quai dentant cunzunt er d'attribuir a las stentas da la polizia chantunala dal Grischun en il sectur da la prevenziun", è persvadì Rathgeb.

In'attenziun speziala ad accidents da pedunas e da peduns
En general na dat nagina strivla melna en egl tras in dumber d'accidents extraordinari, ha declerà Rathgeb. "In'examinaziun sistematica da tut las strivlas melnas per lung da la rait da las vias principalas grischuna tras la polizia chantunala ha dentant mussà che mo 14 pertschient da las strivlas melnas èn senza mancanzas", ha ditg Rathgeb vinavant. Ils gronds deficits pertutgia il pli savens la vesaivladad da las strivlas. 4 pertschient hajan schizunt gì mancanzas uschè grevas ch'ins stoppia allontanar quellas.

Dapi l'onn 1966 mai pli uschè paucas persunas blessadas
Cuntent ha Frehner constatà ch'il dumber da persunas blessadas tar accidents è sa reducì vinavant. Tut en tut sajan quai stadas 646 persunas l'ultim onn. "Quai è in dumber uschè bass sco quai ch'el n'è dapi l'onn 1966 betg pli vegnì cuntanschì", ha accentuà Frehner. Pensiv ha el dentant er constatà – sco l'onn 2011 – ch'er l'ultim onn han puspè 18 persunas pers lur vita sin las vias grischunas tras accidents da traffic.

Cura che l'aura è bella e la via sitga, capitan ils pli blers accidents
Co che Frehner ha explitgà vinavant, saja dà en egl tar l'evaluaziun da la statistica ch'ils pli blers accidents da traffic sajan capitads sin vias sitgas, da bell'aura e sin trajects da via gulivs. "Uschia dastgan ins supponer che automobilistas ed automobilists èn pli concentrads e pli attents, sche las cundiziuns sin via èn pli difficilas e sch'ils trajects èn pretensius", ha cuntinuà Frehner.

La statistica detagliada dals accidents da traffic dal chantun Grischun po vegnir consultada en l'internet sin www.kapo.gr.ch.
Neuer Artikel