Navigation

Seiteninhalt

Ina campagna, in di d'acziun, in num, ina finamira: Damain accidents da motos

  • Erste Mitteilung
  • Neuen Beitrag einfügen
"Smart rider – pensa pli svelt che quai che ti charras." Sut quest titel stattan tant la nova campagna da prevenziun cunter accidents da motos che vegn lantschada da la polizia chantunala dal Grischun sco er il nov Smart Rider Day, fin ussa il Biker Prävi Day, en il center per la segirezza stradala DrivingGraubünden a Cazas. La nova campagna è vegnida preschentada la gievgia avantmezdi da la polizia chantunala dal Grischun a Cazas.

La campagna ch'è vegnida sviluppada en stretga collavuraziun cun l'agentura da reclama da Cuira CLUS ScRL, vegn accumpagnada da placats, d'affischas en ils posts da servetsch, da fegls sgulants e d'inserats. Ultra da quai è la campagna preschenta er en il Facebook.

La prevenziun è ina incumbensa legala
"La prevenziun è ina chaussa impurtanta per la regenza grischuna", accentuescha il cusseglier guvernativ Christian Rathgeb, schef dal departament da giustia, segirezza e sanadad dal Grischun. En general possia la noziun "prevenziun" vegnir translatada cun "evitar problems tras precauziun", di Rathgeb plinavant. "Jau sun perquai zunt led che la polizia chantunala dal Grischun presta lavur da piunier sin quest champ e fa ina tala prevenziun cumplessiva per la gruppa en mira da las motociclistas e dals motociclists." Per Hansjürg Frehner, schef da la polizia da traffic dal Grischun, sa deducescha l'incumbensa preventiva gia da la lescha. "L'incumbensa legala n'è betg mo quella da persequitar delicts e cuntravenziuns ch'èn vegnids enconuschents, mabain d'impedir quels avant ch'els naschan cun tut ils meds che stattan a disposiziun", declera Frehner. Per consequenza saja la segirezza en il traffic sin via ina sfida permanenta, impurtanta ed indispensabla per la polizia. "La lavur da publicitad e da prevenziun demussa per l'ina metodas ch'èn sa cumprovadas e per l'autra metodas innovativas che servan a far attent las motociclistas ed ils motociclists als privels da chaschunar in accident", di Frehner plinavant. En spezial èn quai las controllas preventivas da rutina, ils dis da prevenziun sin las vias dals pass ed il Smart Rider Day dals 26 da matg 2013.

Percurs d'inschign, Chris Rid ed anghel Franky al Smart Rider Day
Il percurs d'inschign, en il qual vegnan eruids ils smart riders da l'onn 2013 en trais categorias, è er quest onn puspè il punct central da l'occurrenza. Ina vita sin duas rodas – betg adina cun tuttas duas sin terra, dentant er betg dal tuttafatg deterradas: Quai è Chris Rid, stunt-rider da Markdorf al Lai da Constanza en Germania. Durant il Smart Rider Day mussa el ina da sias shows las pli impressiunantas che po segiramain vegnir valitada sco in ulteriur punct culminant da l'occurrenza da quest onn. L'anghel Franky ch'è enconuschent da la reclama a la televisiun vegn er ad esser da la partida al Smart Rider Day. En ses costum dad anghel gia quasi legendar vegn el a sa laschar fotografar cun las participantas e cun ils participants sco er cun ils giasts. Preschentas èn er puspè la Rega ed il salvament da Cuira che dattan ina invista da lur lavur. En il vehichel ch'è vegnì preparà aposta datti er la pussaivladad da dar sang. Las novaziuns sin il martgà da motos vegnan preschentadas da tschintg fatschentas da motos che derivan da l'entira Svizra orientala. La polizia chantunala dal Grischun tgira ultra da quai puspè in stan d'infurmaziun davart il tema prevenziun e mussa ils meds d'acziun tecnics che vegnan duvrads en il mintgadi.
Neuer Artikel