Navigation

Seiteninhalt

Grischun/Cuira: Lantschada da la campagna da prevenziun "Manischar empè da sa laschar distrair – nagina distracziun, main accidents"

  • Erste Mitteilung
  • Neuen Beitrag einfügen
Ils motivs principals per grevs accidents da traffic èn la distracziun e l'inattenziun. Ils 24 da settember vegn perquai lantschada ina da las pli grondas campagnas da prevenziun da la polizia da traffic. La polizia chantunala dal Grischun e la polizia da la citad da Cuira han preschentà la campagna a las medias, mardi avantmezdi a Cuira.

L'onn passà han cooperà gia 13 chantuns a la campagna per la segirezza dal traffic. Quest onn sa participescha da nov il concordat da la polizia da la Svizra dal nord. La polizia cuntanscha ussa participantas e participants da traffic en 19 chantuns, da Basilea al Grischun ed al principadi da Liechtenstein per sensibilisar ellas ed els al connex tranter distracziun ed accidents.

Controllas spezialas
"Ils rapports da las medias che cumparan en l'entir pajais vegnan a rinforzar l'effect preventiv. Ultra da quai vegn la campagna accumpagnada da controllas prioritaras da la polizia", ha ditg Ueli Caluori, cumandant da la polizia da la citad da Cuira e parsura da l'uniun dals schefs da la polizia da la Svizra orientala. Che las acziuns sajan dal tuttafatg er en il senn dal program naziunal per la segirezza dal traffic "Via sicura" che vegn realisà dapi il cumenzament da l'onn 2013 pass per pass cun differents pachets da mesiras, ha accentuà Caluori.

Ir cun auto è l'activitad principala
Barbara Hubschmid, la scheffa da la polizia da traffic da la polizia chantunala dal Grischun, ha sclerì cun cifras impressiunantas quant privlus ch'igl è, sch'ins sa lascha distrair al guvernagl sapientivamain u inconscientamain. "Gist èn situaziuns famigliaras sco sin il traject quotidian a la lavur è il privel da sa laschar distrair fitg grond", ha explitgà Hubschmid. L'activitad principala – l'ir cun auto – vegnia "emblidada" e daventia ina chaussa secundara. "Quai pon ins segiramain dir er da las ciclistas e dals ciclists sco er da las pedunas e dals peduns", cuntinuescha Hubschmid. Tranter il grond dumber da cussegls che la polizia dat ha ella menziunà en spezial: "Discurs ed SMS lungs, cumplitgads ed emoziunals na tutgan betg en l'auto."

Teater da pantomimas
En il center da la campagna per la segirezza dal traffic da quest onn stat ina figura da pantomima. Tras la gestica e la mimica mussa l'um sut la mascra tge ch'el fa tut en l'auto – mangiar marenda, scriver SMS e telefonar. Sco en il teater vegnan preschentadas a las aspectaturas ed als aspectaturs las consequenzas da quest agir. Ins po vesair in film sin YouTube e differentas reclamas da televisiun. Placats, flyers d'infurmaziun, inserats da gasetta ed infurmaziuns sin la pagina d'internet sut www.lenken-statt-ablenken. ch èn ulteriurs meds da communicaziun. La campagna dura fin ils 22 d'october 2013.




Link Medien
Neuer Artikel