Navigation

Inhaltsbereich

  • Erste Mitteilung
  • Neuen Beitrag einfügen
Dacurt è vegnì avert uffizialmain a Cuira il nov museum da la polizia chantunala dal Grischun. Il nov museum sa chatta ussa a la Comercialstrasse 19. A medem temp ha er il post spezialisà "prevenziun" ch'è vegnì reorganisà retratg sias novas localitads a la medema adressa.

Da nov pon persunas singulas mintga emprim mardi dal mais visitar mintgamai da las 14.00 fin las 17.00 il museum senza preannunzia. Per l'emprima giada vegn quai ad esser pussaivel ils 7 d'october 2014. Anc adina vegnan purschidas gratuitamain visitas dal museum per gruppas, ma quai sin preannunzia. Il formular d'annunzia per quest intent chattais Vus sin la pagina d'internet www.kapo.gr.ch/polizeimuseum.

Sustegn professiunal
Per concepir il nov museum da polizia avain nus pudì quintar cun in sustegn professiunal extern. Per l'ina è quai stà l'anteriur directur dal museum d'art dal Grischun, Beat Stutzer, e per l'autra il tecnicist da museum Stephan Schenk sco er Roy Perfler. Lur bunas enconuschientschas spezialisadas han procurà essenzialmain ch'il museum ha oz in aspect professiunal e modern.

Prevenziun sut in tetg
L'instrucziun da traffic d'enfin ussa è vegnida integrada en il post spezialisà "prevenziun". Quest post era cumpetent enfin ussa en spezial per la prevenziun cunter la criminalitad. Cun fusiunar la prevenziun da traffic e la prevenziun cunter la criminalitad sa chatta ussa da nov tut la lavur da prevenziun da la polizia sut in tetg.

-
Neuer Artikel