La polizia chantunala dal Grischun ha a partir d'immediat 3 novas polizistas e 14 novs polizists. Venderdi avantmezdi èn ellas ed els vegnids brevetads en in rom festiv en la sala dal cussegl grond a Cuira. Suenter la scolaziun da basa rinforzan els ussa il corp da la polizia chantunala dal Grischun.
3 dunnas e 14 umens han absolvì durant in onn la scola da polizia ad Amriswil (TG) ed èn gia stads activs – en il rom d'in praticum – durant intginas emnas en il chantun Grischun. A partir dal 1. d'october 2015 fan ellas ed els ussa uffizialmain part da la polizia chantunala dal Grischun – cun tut ils dretgs e cun tut las obligaziuns che resultan dal servetsch da polizia. L'empermischun correspundenta sur la bandiera dal Grischun han ellas ed els fatg durant la festa da brevetaziun. Ultra da las confamigliaras e dals confamigliars da las brevetadas e dals brevetads èn er numerusas represchentantas e numerus represchentants da la politica e da l'administraziun sco er d'organisaziuns partenarias sa participads a la festa.
Il cumandant è stà preschent gia ils emprims dus dis
Il cumandant da la polizia chantunala dal Grischun, colonel Walter Schlegel, ha accumpagnà las absolventas ed ils absolvents da la scola da polizia durant l'entir onn da scolaziun. Per el èsi impurtant d'emprender ad enconuscher bain sias novas collavuraturas e ses novs collavuraturs. Perquai ha el passentà gia ils emprims dus dis da la scolaziun ensemen cun la scola da polizia. En vista al mintgadi da lavur che suonda ussa, ha Schlegel appellà a sias novas collavuraturas ed a ses novs collavuraturs da reagir da tut temp ed er en situaziuns difficilas cun persvasiun. "Vus stuais adina esser conscients dal fatg che Vus essas engaschads per la segirezza da la populaziun", ha declerà Schlegel.
"Vus dastgais esser superbis da pudair As engaschar per la segirezza"
Il cusseglier guvernativ Christian Rathgeb ha gratulà a las novas polizistas ed als novs polizists che han fatg lur examen final cun success. Il schef dal departament da giustia, segirezza e sanadad ha ditg a las novas collavuraturas ed als novs collavuraturs: "Vus dastgais esser superbis da far part a partir dad oz da la polizia chantunala dal Grischun e da pudair As engaschar per la segirezza en quest chantun". La polizia chantunala dal Grischun saja in corp da polizia modern, bain scolà, bain equipà ed haja ina direcziun effizienta, ha Rathgeb cuntinuà.
Las novas collavuraturas ed ils novs collavuraturs cun lur emprims lieus da staziunament:
• Balzer Remo, basa da la polizia da traffic San Bernardin
• Bernhard Gian Andrea, basa da la polizia da traffic Silvaplauna
• Boner Andreas, post da polizia Scuol
• Casanova Adrian, post da polizia Scuol
• Christoffel René, post da polizia Puntraschigna
• Chumthong Kritsada, post da polizia Glion
• Demont Andrea Celest, basa da la polizia da traffic San Bernardin
• Falvo Clarissa, post da polizia Roveredo
• Gubser Adrian, post da polizia Puntraschigna
• Jäger Flavio, post da polizia Tavau
• Kessler Jann Andrea, post da polizia Tavau
• Kurath Dario, post da polizia Tavau
• Pfiffner Astrid, basa da la polizia da traffic San Bernardin
• Tschenett Enrico, post da polizia Martina
• Walter Daniela, post da polizia Mustér
• Zinsli Tiziano, post da polizia Samedan
• Zurflüh Adrian, post da polizia Arosa