Navigation

Inhaltsbereich

  • Erste Mitteilung
  • Neuen Beitrag einfügen
La campagna da prevenziun d'accidents cun motos "smartrider.ch" ha durà trais onns. Ussa vegn ella substituida tras la campagna dal ppa "stayin-alive.ch". La polizia chantunala dal Grischun vuless – ensemen cun partenaris – promover il pensar da segirezza en connex cun manischar ina moto.

Durant la stagiun principala da motos, dal matg fin l'october, vegnan montads placats da la segirezza dal traffic per lung dals trajects da moto ils pli frequentads e nua ch'i capitan blers accidents. La campagna "smartrider.ch" ch'è enconuschenta e ludada dapertut vegn substituida tras la campagna "stayin-alive.ch". La campagna da motos "stayin-alive.ch" dal post da consultaziun svizzer per la prevenziun d'accidents (ppa) cumenza – cun motivs actualisads – ses terz onn. Ultra da la nova campagna da prevenziun sa basa la polizia chantunala dal Grischun dentant vinavant sin quai ch'è sa cumprovà.

Il Grischun sco chantun d'excursiuns
Ils pass sur las Alps sco er cuntradas e trajects attractivs fan ch'il Grischun è ina destinaziun d'excursiuns bainvegnida. Quai na vala betg mo per viandants e ciclists, mabain er per motociclistas e motociclists! L'onn 2015 hai dà sin las vias dal Grischun passa 160 accidents cun motos. Legraivlamain hai dà damain accidents mortals cun motos che l'onn precedent. En la gronda part dals accidents era la via sitga e l'aura buna. Tar ca. 120 accidents cun la moto èn las motociclistas ed ils motociclists stads sezs la culpa. Da quai vesan ins quant impurtantas che l'abilitad, la pratica e la capacitad da charrar ina moto èn.

Il pensar da segirezza vegn promovì
Blers accidents cun motos derivan d'ina sveltezza nunadattada. Cunzunt tar curvas èsi da dar adatg. In ulteriur privel èn ils auters participants dal traffic. La campagna "stayin-alive.ch" s'occupa da questa tematica/problematica da partenaris. Las autas prestaziuns dals motors e las tecnicas inschignusas dals schassis na van betg adina a prà cun la moda da charrar dals manischunzs. Ma quai è ina premissa indispensabla per ina stagiun da motos cun success e senza accidents. Per quest intent vegnan purschids curs da charrar. En quests curs vegnan trenadas l'abilitad e la fitness da charrar. Il center per la segirezza stradala DrivingGraubünden a Cazas porscha – sut il patrunadi ed accumpagnà da la polizia chantunala dal Grischun – in dumber limità da curs da basa per motociclists, che vegnan sustegnids finanzialmain.

Giudair la moto cun in bun sentiment
En sia prevenziun cunter accidents cun motos sa basa la polizia chantunala – ensemen cun ses partenaris da segirezza – anc adina sin las suandantas trais pitgas ch'èn sa cumprovadas: mesiras repressivas (p.ex. controllas da sveltezza), utilisaziun dal potenzial da la construcziun da vias (p.ex. trajects ch'èn meglier renconuschibels) e lavur da prevenziun (p.ex. acziun da placats ed acziuns sin pass e tar lieus d'accidents). Questas mesiras duain permetter ils motociclists da giudair lur excursiuns en il bel Grischun ed als laschar turnar a chasa senza accidents. Ma cler è er il suandant messadi: Tgi che sa cuntegna correctamain, prospectivamain e precautamain en il traffic sin via, è main periclità da vegnir involvì en in accident.

-

Qua arrivais Vus tar la campagna "stayin-alive.ch"
Neuer Artikel