La polizia chantunala dal Grischun ha duas novas polizistas e trais novs polizists. A la festa da brevetaziun, venderdi avantmezdi en la sala dal cussegl grond a Cuira, han ellas ed els prestà l'empermischun. Suenter ina scolaziun intensiva cumenzan ellas ed els immediat lur servetsch en il corp da polizia dal chantun.

Las collavuraturas ed ils collavuraturs acceptads da nov en il corp da polizia ston prestar ina empermischun envers il cumandant da polizia, uschia prescriva l'artitgel 25 da l'ordinaziun da polizia. Walter Schlegel, il cumandant da la polizia chantunala dal Grischun, ha recità – per introducir la brevetaziun – l'empermischun: "Jau empermet da respectar la constituziun e las leschas, da far obedientscha a la regenza dal chantun sco er a las superiuras ed als superiurs, d'ademplir mias obligaziuns senza resguard da la persuna, senza ma laschar corrumper e tenor meglier savair e pudair, da ma tegnair strictamain a la vardad, da resguardar e da proteger ils dretgs da las burgaisas e dals burgais, da restar discreta u discret davart funcziuns e davart percepziuns da servetsch e d'impunder tut mia forza per liquidar mias incumbensas." Sur la bandiera sbassada han las novas commembras ed ils novs commembers dal corp respundì: "Jau empermet".

Colliaziuns impurtantas èn naschidas
Walter Schlegel ha evocà en ses discurs il mintgadi da scola en la scola da polizia da la Svizra orientala ad Amriswil: "Vus essas ids a scola ensemen cun Vossas collegas e Voss collegas d'auters corps da polizia. Da quai èn naschidas colliaziuns che Vus na vulais betg manchentar. Quai facilitescha er la lavur transcunfinala." La finala adempleschia quai er in giavisch central dal concordat da polizia da la Svizra orientala, ha cumplettà Schlegel. El ha appellà da demussar ina buna tenuta er en situaziuns difficilas e da reagir en moda sincera e persvadenta. L'agir e la demananza da las polizistas e dals polizists furmian decisivamain il maletg da la polizia, di Schlegel.

"Ina professiun tut speziala"
Il president da la regenza Christian Rathgeb ha accentuà en sia allocuziun la professiun da polizista u polizist sco professiun tut speziala cun obligaziuns e dretgs spezials. Il schef dal departament da giustia, segirezza e sanadad ha renvià a las retschertgas, da las qualas resulta mintga onn che la polizia saja l'instituziun statala en Svizra, envers la quala la populaziun haja la pli gronda fidanza. "Nus pudain mantegnair questa fidanza mo, sch'i regia ina cultura correspundenta en il corps", ha ditg Rathgeb ed ha cumplettà: "Jau spetg che Vus ageschias cleramain, consequentamain, e nua ch'igl è necessari cun direzza, dentant adina correctamain e loialmain envers Voss superiurs." Ina tenuta professiunala signifitgia dentant er da scuntrar tuts cun dignitad umana e da tractar tuts cun egualitad giuridica, ha accentuà Rathgeb.

A la festa èn sa participadas las confamigliaras ed ils confamigliars da las brevetadas e dals brevetads sco er numerusas represchentantas e numerus represchentants da la politica, da l'administraziun e d'organisaziuns partenarias. La festa da brevetaziun è vegnida enramada musicalmain – sco ch'igl è tradiziun – da la musica da la polizia dal Grischun.

Las novas polizistas ed ils novs polizists da la polizia chantunala dal Grischun cun lur emprims lieus da staziunament:

Alessandra Tomaschett, post da polizia Martina
Andreas Pilatti, post da polizia Samedan
Samantha Lippuner, post da polizia Silvaplauna
Adriano Caviezel, basa da la polizia da traffic Silvaplauna
Roger Janett, basa da la polizia da traffic Silvaplauna

Las duas novas commembras ed ils trais novs commembers dal corp avevan cumenzà lur scolaziun l'october 2015 a la scola da polizia da la Svizra orientala ad Amriswil. Ellas ed els tuts han reussì cun success l'examen professiunal federal il settember 2016. La proxima scola da polizia cumenza il 1. d'october 2016.