Glindesdi avantmezdi ha la polizia chantunala dal Grischun preschentà en ina conferenza da medias a Cuira la statistica criminala da la polizia 2016. La situaziun dal total dals delicts mussa puspè ina tendenza regressiva.
En il chantun Grischun èn vegnids registrads l'onn passà 8920 delicts. Plinavant vegnan ils blers delicts commess en il sectur dal cudesch penal svizzer (CP), numnadamain 77,0 % (onn precedent 75,0 %) da tut ils delicts. En il sectur dal CP èn sa diminuids ils malfatgs sin 6870 (onn precedent 7086). Vinavant han il territori da Cuira e sias aglomeraziuns la chargia la pli gronda.
Umens inculpads tranter 20 e 29 onns
Ina gronda part da las persunas inculpadas èn umens en la vegliadetgna da 20 fin 29 onns. Entaifer questa classa da vegliadetgna èn 81,5 % da las persunas inculpadas umens. 45,3 % dal total da las persunas inculpadas èn persunas estras. Bundant la mesadad da quellas viva permanentamain en Svizra.
Quotas da scleriment stabilas
La quota da scleriment en il sectur dal CP è 41,1 %. Quai è bler. Per ils delicts cunter il corp e cunter la vita sco er cunter l'integritad sexuala è la quota da scleriment en total medemamain stabila e sa chatta tar passa 90 %. Malgrà scleriments per part fitg pretensius en il sectur dals delicts da facultad ha er questa quota da scleriment pudì vegnir augmentada e sa chatta ussa tar 26,3 % (plus 3,1 %).
Nivel dal grad da criminalitad
"Il grad da criminalitad en noss chantun è per tradiziun relativamain favuraivel en cumparegliaziun cun l'entira Svizra", declera Gianfranco Albertini, schef da la polizia criminala dal Grischun. "Quai dastgass er derivar da noss chantun fermamain fragmentà geograficamain e socialmain sco er da sia exposiziun che ha ina tscherta distanza dals centers d'aglomeraziun", sco che Albertini terminescha.
Cybercrime
Adina dapli delicts han ina relaziun cun ils meds da communicaziun moderns. Sextorsiun, engion en l'internet, extorsiun per e-mail, ladernitsch da datas, phishing ed auters da quests delicts s'augmentan permanentamain. En il futur vegnan quests delicts registrads separadamain per la statistica. Per cumbatter cunter la cybercriminalitad vegn la polizia chantunala dal Grischun ad amplifitgar las resursas materialas e persunalas en il sectur da la forensica da tecnologia d'infurmaziun, da la cyberinvestigaziun e da la cyberanalisa. L'engrondiment dals servetschs correspundents duai pudair vegnir terminà anc quest onn.