Tar en tut 2220 accidents da traffic èn mortas l'onn 2017 19 persunas sin las vias dal Grischun, 5 dapli che l'onn precedent. 645 persunas èn vegnidas blessadas en accidents da traffic. En cumparegliaziun cun l'onn passà correspunda quai ad in augment da main che 1 pertschient. Quai resorta da la statistica actuala d'accidents da l'uffizi federal da vias (UVIAS).
L'onn 2017 hai dà en il chantun Grischun totalmain 2220 accidents da traffic registrads da la polizia. Quai correspunda pli u main a la media dals onns 2012 fin 2016 e dastga vegnir considerà sco positiv, sch'ins resguarda ch'il dumber da vehichels en il chantun Grischun è creschì er l'onn passà per circa 2100 vehichels a motor.
Dapli accidents cun donns da persunas, main accidents cun donns materials
Ils accidents cun donns da persunas èn creschids per ca. 3,5 %, tar quels cun donns materials ha pudì vegnir constatada ina reducziun da 4,7 %. Allegraivel èsi che main persunas èn vegnidas blessadas grevamain (-5.5 %) en cumparegliaziun cun ils ultims 5 onns. Cun totalmain 19 persunas disgraziadas mortalmain sto vegnir cumprovà – en cumparegliaziun cun l'onn precedent – in augment da 5 (+36 %). Cumpareglià cun ils ultims 5 onns po vegnir constatada ina diminuziun leva, ma cuntinuanta tar ils accidents da traffic ch'èn vegnids chaschunads sut l'influenza da narcotics e da medicaments sco er tar ils accidents chaschunads pervia d'alcohol. Allegraivel èsi plinavant ch'ils accidents sin las autovias èn sa reducids per 22 %.
Dapli accidents mortals cun motos
Il dumber dals accidents cun motos è s'augmentà levamain en cumparegliaziun cun il nivel da l'onn precedent . Entant ch'ins ha stuì constatar in augment tar las persunas disgraziadas mortalmain (+2), è sa diminuì il dumber dals motociclists blessads (-7). Er tar las persunas ch'èn sa blessadas en in accident cun in velo u cun in e-bike sco er tar las pedunas e tar ils peduns blessads sto vegnir registrà in lev augment. Tar ils accidents mortals cun pedunas e peduns po percuter vegnir registrà in regress.
Sveltezza memia auta e distracziun sco ristgas
279 accidents da traffic (-20 %) èn capitads pervia d'ina sveltezza memia auta. Sco indizi per la diminuziun po vegnir resguardada tranter auter l'activitad da controlla pli intensiva. La distracziun en il traffic sin via è fermamain derasada ed è ina gronda ristga. Quai demussa il fatg che circa 10 % da tut ils accidents da traffic capitan pervia d'inattenziun e pervia da distracziun.
La statistica detagliada dals accidents da traffic dal chantun Grischun po vegnir consultada en l'internet sut
www.kapo.gr.ch/service/statistik.