Il cumandant Walter Schlegel vegn ad organisar da nov la structura da commando da la polizia chantunala dal Grischun per ils 15 da matg 2019. En la nova organisaziun è centrala la nova funcziun dal vicecumandant. Proximamain vegni a dar midadas persunalas en la direcziun da la polizia criminala ed en la direcziun da la polizia da traffic.

L'uffizi principal dal vicecumandant vegn surpiglià da Gianfranco Albertini (55 onns) ch'è stà fin ussa schef da la polizia criminala. Nova scheffa da la polizia criminala daventa Barbara Hubschmid (42 onns) ch'è stada fin ussa scheffa da la polizia da traffic. Il schef da stab Robert Willi (58 onns) daventa nov schef da la polizia da traffic. Cun reducir redundanzas – fin ussa aveva il cumandant dus substituts – daventa l'organisaziun concisa, effizienta, progressiva e flexibla.

Examinaziun da l'organisaziun e da las incumbensas en duas fasas

La nova structura da commando è il resultat da l'emprima fasa che ha cumpiglià l'examinaziun da l'organisaziun e da las incumbensas. Focussà èsi vegnì sin las substituziuns e sin la gestiun publica. En la segunda fasa vegnan analisadas l'organisaziun e las incumbensas entaifer la structura dal corp e là, nua che quai è necessari, survegnan ellas ina nova orientaziun.