Glindesdi avantmezdi ha la polizia chantunala dal Grischun preschentà en ina conferenza da medias a Cuira la statistica criminala da la polizia 2018. Il dumber total dals delicts è s'augmentà levamain en cumparegliaziun cun l'onn precedent. A quest fatg s'oppona la quota da scleriment en moda positiva. Ella è creschida anc ina giada en cumparegliaziun cun l'onn precedent.

En il chantun Grischun èn vegnids registrads l'onn passà 8'974 delicts. Quai èn 433 dapli che l'onn 2017. Tuttina è questa tendenza regressiva a lunga vista. La pli gronda part èn malfatgs cunter il cudesch penal svizzer, numnadamain 6'808 (onn precedent 6'287). Per cumparegliar: L'onn 2009, cura che la statistica criminala da la polizia è vegnida fatga per l'emprima giada tenor criteris da registraziun unifitgads en Svizra, èn vegnids registrads 8'156 malfatgs cunter il cudesch penal svizzer. Tar ils delicts da violenza grevs è vegnì registrà in regress da 3 cas envers l'onn precedent (da 42 a 39). Quai èn dus mazzaments, 27 blessuras corporalas grevas ed 8 violaziuns. Els èn vegnids sclerids a 100 %. 92,9 % da tut ils delicts da violenza (onn precedent 92 %) èn vegnids sclerids. In dumber da delicts pli grond han principalmain l'aglomeraziun da Cuira e la Mesolcina.

Augment tar las blessuras corporalas levas e tar las constricziuns
La gronda part dals delicts da violenza èn smanatschas, blessuras corporalas levas, acts da violenza, constricziuns, baruffas e violenza/smanatschas cunter funcziunarias e funcziunaris. Tar las blessuras corporalas levas hai dà in augment da 111 sin 128 cas, tar las constricziuns in augment da 38 sin 48 cas. En il rom da relaziuns sumegliantas ad ina famiglia è regredida la violenza a chasa da 238 a 214 cas, 56 % da quels (onn precedent 57,5 %) pertutgan relaziuns actualas da pèrs resp. da partenaris.

Malfatgs da facultad
Praticamain la mesadad dal dumber total dals delicts concerna ils malfatgs da facultad, numnadamain 4'237 malfatgs (3'978 onn precedent). La pli gronda part da quests malfatgs da facultad èn enguladitschs cun 1'992 cas (1'861 onn precedent).