Il venderdi suentermezdi ha la polizia chantunala dal Grischun salvà sia festa da promoziun en l'auditori da la banca chantunala a Cuira. Il cumandant Walter Schlegel ha drizzà il focus da ses pled sin las midadas e sin il svilup dal corp da polizia.
Il svilup da la polizia chantunala dal Grischun sa basa sin il program da la regenza 2017-2020 sco er sin il rapport "Polizia dal Grischun 2015plus" e sa chatta en la fasa da project. Il corp da polizia è en il futur organisà tenor secturs d'acziun e na vegn betg pli a sa basar sin la structura da posts da pitschna dimensiun che deriva dals onns 1970. Ina infrastructura dad IT moderna e la mobilitad procuran per ina preschientscha da la polizia pli gronda ed uschia per dapli segirezza e proximitad a las burgaisas ed als burgais. Da l'organisaziun da grond spazi resultan cundiziuns da lavur pli flexiblas e pli attractivas per las collavuraturas ed ils collavuraturs.
Unifurmas novas
A partir da l'atun 2019 survegnan las collavuraturas ed ils collavuraturs ultra da quai unifurmas novas modernas. La polizia chantunala dal Grischun è in dals 16 corps da polizia che sa participescha a l'acquisiziun cuminaivla e che procura uschia per in'apparientscha unitara.
Instrucziun da basa da la polizia da dus onns
Il 1. d'october 2019 cumenzan las aspirantas ed ils aspirants da polizia cun la nova instrucziun da basa da la polizia che dura dus onns. L'emprim onn al center d'instrucziun regiunal ad Amriswil va a fin cun absolver l'examen svizzer unitar davart la capacitad d'intervenziun. En il segund onn applitgeschan las polizistas ed ils polizists futurs en moda pratica en il corp da polizia quai ch'els han emprendì e termineschan l'instrucziun cun l'examen professiunal federal. Las novaziuns en il sectur da l'instrucziun èn il resultat dal concept general da furmaziun (CGF).
Stgaffir confidenza e cuntinuitad
Walter Schlegel ha suttastritgà che polizistas e polizists sajan confruntads directamain cun midadas en la societad e cun il svilup tecnic. Pervia da quai stoppian ellas ed els esser scolads bain sin tut ils champs ed avair a disposiziun il material il pli modern per pudair far lur lavur, en il servetsch da la segirezza da la populaziun, sut cundiziuns attractivas. Il cusseglier guvernativ ha gratulà a las polizistas ed als polizists per lur promoziun. El ha apprezià lur prontezza da s'engaschar per il bain da nossa societad, da sa metter en quest connex er en privel e d'esser activas ed activs sin in champ, sin il qual ellas ed els sajan adina er exponids a blera critica. El ha punctuà: "Collavuraturas meritadas e collavuraturs meritads sco Vus gidan gist en quests temps accelerads, sco che nus als enconuschain oz, a stgaffir confidenza en la populaziun ed a furmar ina cuntinuitad impurtanta en il corp." La festa da brevetaziun è vegnida enramada da la musica da polizia dal Grischun.
Promoziun e brevetaziun en il futur en in'occurrenza
A partir da l'onn 2020 vegn la festa da promoziun ad avair lieu mintgamai il settember, a partir da l'onn 2021 ensemen cun la festa da brevetaziun.
Promoziuns 2019
Promoziuns ordinarias: 28
La promoziun al sergent premetta in temp da servetsch da 10 onns ed in examen da spezialist reussì, quella al corporal in temp da servetsch da 6 onns e tala a l'appuntà in temp da servetsch da 3 onns.
Promoziuns funcziunalas: 18
Promoziun da commembras e commembers dal corp che han surpiglià ina funcziun pli auta en il decurs da l'onn.
Saramentaziun: 1
Polizistas e polizists che vegnan d'in auter corp fan in'empermischun.
