A partir da glindesdi, ils 19 d'avust 2019, èsi puspè uschenavant. En differentas vischnancas dal Grischun cumenza in nov onn da scola e millis d'uffants dumognan per l'emprima giada lur via da scola u da scolina. La polizia chantunala dal Grischun vegn a rinforzar sia preschientscha en la vischinanza da las chasas da scola e da las scolinas.

Ina campagna dal post da cussegliaziun svizzer per la prevenziun d'accidents ppa fa attent en moda e maniera simpla al cumenzament da scola. La polizia chantunala dal Grischun sustegna la campagna "Attenziun: uffants surprendan!" e supplitgescha a tut las participantas ed ils participants dal traffic d'esser zunt precauts.

Tschintg motivs:

• Uffants èn leghers e sa laschan distrair svelt.
• Els na san anc betg valitar bain las distanzas e las sveltezzas.
• Uffants èn anc pitschens ed han ina vista limitada.
• Els na san anc betg valitar bain ils privels.
• Els na san anc betg localisar ed identifitgar bain las ramurs.

Perquai èsi zunt impurtant da sa cumportar correctamain en il traffic e da dar in'attenziun speziala als uffants.

Tschintg tips gidan a render la via da scola pli segira per ils uffants.

• Faschai quint cun tut tar uffants.
• Reduci Vossa sveltezza.
• Sajas pronts da franar.
• Fermai dal tuttafatg a la strivla melna.
• Faschai dubla attenziun en ils conturns da las scolas.

Uffants na sa disgrazian betg mo sin la via da scola. Els sa disgrazian per exempel er sin la via a l'instrucziun musicala, a la plazza da giugar u al bogn avert. Accidents capitan durant tut las stagiuns. Cunzunt però durant ils mais chauds, cur ch'ils uffants sa trategnan dapli en il liber.

Taxi da geniturs
Desisti da manar Voss uffant cun l'auto a scola respectivamain a scolina. Vus periclitais auters uffants en ils conturns da la chasa da scola u sin la via da scola. Ultra da quai impedis Vus a Voss uffant da giudair la via da scola.

Accumpagnai Voss uffant l'emprim sin la via da scola ed agi en moda exemplarica. Uffants emprendan cunzunt cun imitar. Uschia pon els sa sviluppar pli e pli a participants dal traffic segirs.

Guardai che Voss uffant portia vestgadira clera u reflectanta, per ch'el saja pli bain visibel en il traffic sin via.

Dapli preschientscha da la polizia il cumenzament da scola
Per segirar las vias da scola e per proteger las participantas ed ils participants dal traffic ils pli giuvens, vegn la polizia chantunala dal Grischun a far dapli controllas da la sveltezza e da las vias da scola en las vischnancas.

Maletgs: ppa