Navigation

Inhaltsbereich

  • Erste Mitteilung
  • Neuen Beitrag einfügen

A Puschlav ha gì lieu glindesdi l'emprim di d'instrucziun per rinforzar la collavuraziun transcunfinala da las autoritads polizialas. La collavuraziun ch'è vegnida iniziada da la polizia chantunala dal Grischun, è ina basa per segirar il territori da cunfin cun l'Italia.

A partir da l'onn 2020 vegnan a circular patruglias maschadadas dals carabinieris, da la polizia di stato, da l'administraziun federala da duana e da la polizia chantunala dal Grischun en las provinzas da Bulsaun e da Sondrio sco er en il Grischun. Cun questa collavuraziun internaziunala pon vegnir rinforzadas vinavant ed extendidas las stentas cunter la criminalitad transcunfinala al cunfin sid.

Instrucziun cuminaivla sut la direcziun da la polizia chantunala dal Grischun
A Puschlav èn stads represchentads l'emprim dals quatter dis d'instrucziun ün substitut dal general Roberto Campisi da la polizia di stato sco er il vicecumandant da la polizia chantunala dal Grischun, litinent colonel Gianfranco Albertini. En lur pleds han els accentuà la voluntad e l'impurtanza da far controllas cuminaivlas. Sut la direcziun da la polizia chantunala dal Grischun vegnan circa 30 forzas d'acziun da l'Italia e da la Svizra instruidas principalmain concernent las cundiziuns giuridicas da mintgamai l'auter stadi. In segund bloc d'instrucziun vegn a suandar il december 2019 a Schlanders (I). Las regiuns d'acziun ch'èn vegnidas fixadas per las controllas cuminaivlas en Svizra èn il Mesauc, Valragn, l'Engiadina, la Bregaglia, la Val Puschlav e la Val Müstair. En l'Italia vegnan fatgas controllas cuminaivlas en la Vuclina, en la Val San Giacomo, en il Livign sco er en las regiuns dal Vnuost e dal Raisch. Cun questas controllas cuminaivlas speran la polizia chantunala dal Grischun e lur partenaris da segirezza da pudair survegliar meglier quest territori da cunfin che vegn considerà sco territori da criminalitad.

Bunas experientschas cun collavuraziun en il territori da cunfin cun l'Austria
Dapi var 10 onns fa la polizia chantunala dal Grischun ensemen cun l'administraziun federala da duana e cun las autoritads austriacas da duana controllas transcunfinalas cuminaivlas en il territori da cunfin cun l'Austria. Questa collavuraziun è sa cumprovada. Cun la cunvegna tranter il cussegl federal e la regenza da la republica da l'Italia davart la collavuraziun da las autoritads da polizia e da duana, ch'è entrada en vigur il 1. da november 2016, ha pudì vegnir messa la basa per ina collavuraziun cumparegliabla en il territori da cunfin cun l'Italia.

 

-

 

 

-

 

Neuer Artikel