Navigation

Seiteninhalt

Grischun: Statistica criminala da la polizia 2019 cun pauc dapli delicts che l'onn 2018

  • Erste Mitteilung
  • Neuen Beitrag einfügen

Tenor la Statistica criminala actuala da la polizia dal chantun Grischun è il dumber total da delicts s'augmentà levamain en cumparegliaziun cun l'onn precedent. In regress po vegnir constatà tar ils delicts en il sectur dal Cudesch penal, da la Lescha da narcotics e da la Lescha davart las persunas estras e l'integraziun.

En il chantun Grischun èn vegnids registrads l'onn passà 9'023 delicts. Quai èn 49 dapli che l'onn 2018. Legraivel èsi ch'il dumber da delicts cunter il Cudesch penal (CP), cunter la Lescha da narcotics (LN) e cunter la Lescha davart las persunas estras e l'integraziun (LEI) è sa reducì per 385 malfatgs. La pli gronda part èn malfatgs cunter il Cudesch penal, numnadamain 6'579 (onn precedent 6'808). Per cumparegliar: L'onn 2009, cur che la Statistica criminala da la polizia è vegnida fatga per l'emprima giada tenor criteris da registraziun unifitgads en Svizra, èn vegnids registrads 8'156 malfatgs cunter il Cudesch penal svizzer. Tar ils delicts da violenza grevs è vegnì registrà in regress da 7 cas envers l'onn precedent (da 39 a 32). S'augmentà è il dumber da delicts cunter ulteriuras leschas federalas accessoricas (da 613 a 1'047). Quels na vegnan betg tractads pli detagliadamain en la Statistica criminala da la polizia.

Augment da baruffas sco er da violenza e da smanatscha cunter funcziunaris
La gronda part dals delicts da violenza èn smanatschas, acts da violenza, blessuras corporalas simplas, baruffas, violenza resp. smanatscha cunter funcziunaris e constricziuns. Tar las baruffas vegn registrà in augment da 42 a 59 cas, tar la violenza e tar la smanatscha cunter funcziunaris in augment da 40 a 50 cas. En il rom da relaziuns sumegliantas ad ina famiglia è puspè regredida la violenza a chasa da 214 a 196 cas, 50 % da quels (onn precedent 58 %) pertutgan relaziuns actualas da pèrs resp. da partenaris.

Malfatgs da facultad
60 % da tut ils delicts en il sectur dal Cudesch penal concernan ils malfatgs da facultad, numnadamain 3'970 (onn precedent 4'237). La pli gronda part da quests malfatgs da facultad èn enguladitschs, numnadamain 1'915 cas (onn precedent 1'992).

La versiun detagliada da la Statistica criminala da la polizia 2019 dal chantun Grischun po vegnir consultada en l'internet sut www.kapo.gr.ch/service/statistik.

Infurmaziuns
La scheffa da la Polizia criminala da la Polizia chantunala dal Grischun, maiora Barbara Hubschmid, stat a disposiziun glindesdi, ils 23 da mars 2020, da las 14.00 fin las 16.00, a las collavuraturas ed als collavuraturs da las medias per dumondas ed intervistas individualas. Coordinaziun dals termins sur e-mail info@kapo.gr.ch.

Neuer Artikel