Per verifitgar che l'Ordinaziun davart COVID-19 dal Cussegl federal vegnia observada, ha la Polizia chantunala dal Grischun controllà plazzals e manaschis en tut il chantun. La bilantscha da las controllas fatgas la fin da l'emna passada ed il cumenzament da questa emna è positiva.

Tut en tut ha la Polizia chantunala dal Grischun controllà sin 113 plazzals e manaschis, sche las prescripziuns da l'art. 7d da l'ordinaziun vegnan observadas. Quest artitgel oblighescha las patrunas ed ils patruns tranter auter da limitar il dumber da persunas preschentas sin ils plazzals u en ils manaschis, per che las recumandaziuns da l'Uffizi federal da sanadad publica (UFSP) concernent l'igiena e la distanza sociala possian vegnir observadas. En connex cun ils 113 plazzals e manaschis controllads en la Mesolcina, en l'Engiadina ed en autras parts dal chantun èn resultadas mo duas reclamaziuns. Quai mussa che l'Ordinaziun davart COVID-19 dal Cussegl federal vegn actualmain observada fitg bain.