La Polizia chantunala dal Grischun ha 5 novas polizistas e 14 novs polizists. En la sala da l'hotel Marsöl a Cuira èn ellas ed els vegnids integrads gievgia saira en il corp da polizia. Per observar las mesiras da protecziun areguard COVID-19 ha la ceremonia gì lieu en in rom pitschen, dentant sco adina festiv.

Cun dar il maun sur la bandiera dal corp han las 5 novas commembras ed ils 14 novs commembers dal corp dà lur empermischun d'uffizi al cumandant, colonel Walter Schlegel. "Qua tras surpigliais Vus a partir dad oz ina incumbensa statala impurtanta en il sectur da la segirezza", ha ditg Schlegel ed ha accentuà: "Sco commember da la Polizia chantunala dal Grischun represchentais Vus il monopol da la pussanza dal stadi. Quai cumpiglia gronda responsabladad e buna cumpetenza sociala. Sco polizistas e polizists As muvais Vus en tut las classas da la societad ed en tut las situaziuns da vita. Vus vesais ils quitads e las temas dals umans e Vus stuais prestar agid, sch'i smanatscha in privel u sch'i regia miseria e sch'ils umans na sa pon betg pli gidar sezs. Lura stuais Vus esser pronta u pront d'applitgar Vossa savida e Vossas enconuschientschas, Voss curaschi e Vossa experientscha, Vossa premura envers ils umans sco er d'As cumprovar en l'incumbensa." En sia allocuziun ha il cusseglier guvernativ Peter Peyer gratulà a las brevetadas ed als brevetads per l'examen professiunal federal reussì. "Vus essas il simbol da las valurs marcantas da la lavur da la polizia sco la dignitad umana, l'imparzialitad, l'abilitad da lavurar en in team, l'autoreflexiun. Vivi questas valurs en Voss mintgadi professiunal futur."

Spustà la scolaziun pratica
La Scola da polizia 2019/2020 duess esser l'emprima scola che – tenor il Concept general da furmaziun – dura 2 onns empè da sco fin ussa mo 1 onn. Ma pervia dal coronavirus ha l'Institut svizzer da polizia decidì da metter en vigur il nov Reglament d'examen pir il 1. da schaner 2021. Uschia ha la Scola da polizia 2019/2020 realisà sia furmaziun fundamentala tenor il Plan d'instrucziun vertent e terminà quella suenter 1 onn.

Lieus da staziunament per il 1. d'october 2020
Las 5 novas commembras ed ils 14 novs commembers dal corp avevan cumenzà lur scolaziun l'october 2019 en la Scola da polizia da la Svizra orientala ad Amriswil. Il 1. d'october 2020 entran ellas ed els en servetsch en ils suandants lieus da staziunament:

Lorena Aliesch:Basa da polizia Partenz

Nicole Bächtold: Basa da polizia Tavau

Gian Carigiet: Basa da polizia Partenz

Chiara Colombi: Basa da polizia Beverin

Michael Danuser: Basa da polizia Beverin

Fabian Dora: Basa da polizia Tavau

Flavio Emmenegger: Basa da polizia Engiadina Bassa

Andrin Engler: Basa da polizia Engiadin'Ota-Bregaglia

Chris Hediger: Basa da polizia Partenz

Sebastian Kern: Basa da polizia Montalin

Maurus Olgiati: Basa da polizia Engiadin'Ota-Bregaglia

Andrea Rade: Basa da polizia Engiadina Bassa

Tobia Riedi: Basa da polizia Roveredo

Stefan Riedi: Basa da polizia Beverin

Flavio Schuoler: Basa da la Polizia da traffic San Bernardin

Carlo Sonderer: Basa da polizia Montalin

Martina Sutter: Basa da polizia Montalin

Simon Toutsch: Basa da la Polizia da traffic Silvaplauna

Anigna Züger: Basa da polizia Engiadin'Ota-Bregaglia