A temp per il cumenzament da la stagiun da velo ha la Polizia chantunala dal Grischun cumenzà la primavaira cun l'instrucziun da las scolaras e dals scolars en il curtin da traffic. En la Mesolcina ha l'instrucziun gì lieu gia durant in'emna da l'avrigl 2021. A partir dals 3 da matg 2021 è il curtin da traffic staziunà a Domat.

En il Grischun è questa instrucziun da traffic pratica in punct culminant per bleras scolaras e blers scolars dal stgalim bass. Il curtin da traffic da la Polizia chantunala dal Grischun. In lieu segir per emprender d'enconuscher las reglas da traffic cun l'agen velo u cun in velo mess a disposiziun. Durant in'ura pon classas annunziadas profitar da las enconuschientschas specificas dals instructurs da traffic dal post spezialisà Prevenziun da la Polizia chantunala. En il curtin da traffic vegnan simuladas differentas situaziuns e vegn instruì il dretg cumportament. Dals 3 da matg fin ils 4 da zercladur 2021 è il curtin da traffic staziunà a Domat sin l'areal da l'anteriura resgia Stallinger.

Cumenzament da l'instrucziun en la Mesolcina
Tranter ils 13 ed ils 21 d'avrigl 2021 èn gia 26 classas cun passa 400 uffants da la 1. fin 6. classa vegnidas instruidas davart reglas da traffic existentas e novas per ciclistas e ciclists a Roveredo. Las magistras ed ils magisters da las scolas da Mesauc e da Roveredo beneventan zunt fitg che la Polizia chantunala dal Grischun porscha questa instrucziun pratica. Plinavant saja quai ina variaziun rinfrestganta a l'instrucziun da mintga di.

Instrucziun en tut il Grischun
Il curtin da traffic visita mintga onn tut il Grischun, e quai alternantamain en differents lieus. Quest onn vegn il curtin da traffic installà dals 7 fin ils 18 da zercladur 2021 er anc a Casti ed a Savognin e l'atun 2021 lura a Rabius. L'onn proxim vegnan previsiblamain puspè las scolas da la regiun Valragn, Tumleastga, Mantogna e Puschlav a pudair beneventar il curtin da traffic.