Navigation

Inhaltsbereich

  • Erste Mitteilung
  • Neuen Beitrag einfügen

La Polizia chantunala dal Grischun e la Polizia da la citad da Cuira midan sin multas QR. Ils corps da polizia van cun il temp e sa focusseschan sin medias digitalas. Grazia ad in'app da multas pon las multas vegnir emessas en l'avegnir sur il telefonin. Cun l'app sa reducescha la lavur administrativa tant per la polizia sco er per las persunas chastiadas.

Il cedel da multas QR cuntegna da nov mo pli in code QR. La polizista u il polizist registrescha las datas ch'èn necessarias en l'app cun il telefonin persunal. Suenter vegnan las datas transmessas directamain a l'administraziun da la polizia.

Pajar da nov directamain online
Las persunas che survegnan la multa fan in scan dal code ed arrivan uschia directamain sin il portal da multas da la Polizia chantunala dal Grischun u da la Polizia da la citad da Cuira. Qua survegnan ellas ulteriuras infurmaziuns en las linguas rumantsch, talian, englais, franzos e tudestg. Sch'insatgi auter è charrà cun il vehichel, pon vegnir annunziadas las datas da la persuna responsabla. Tgi che ha deponì in med da pajament sin il telefonin, po pajar sia multa directamain sur l'app. Supplementarmain datti la pussaivladad d'empustar in cedel da pajament.

Midada graduada
Entant che la Polizia da la citad da Cuira dovra l'app a partir d'immediat en tut il territori da la citad, introducescha la Polizia chantunala dal Grischun las multas QR en etappas fin mez settember en tut il chantun. Vischnancas interessadas pon medemamain s'associar al project a partir dal 1. d'october. 

Preschentaziun dals 9 d'avust 2021
Neuer Artikel