A partir dal glindesdi, ils 16 d'avust 2021, èsi puspè tant enavant. En bleras parts dal Grischun cumenza in nov onn da scola. Millis d'uffants fan la via da scola u da scolina per l'emprima giada. La Polizia chantunala dal Grischun vegn a rinforzar sia preschientscha en la vischinanza da las scolinas e da las chasas da scola.

En la vischinanza d'uffants na pon manischunzas e manischunzs betg esser precauts avunda e ston far quint cun tut. Tuttenina po ina situaziun ch'è apparentamain segira daventar fitg privlusa. La Polizia chantunala dal Grischun sustegna la campagna "Attenziun: uffants surprendan!" dal Post da consultaziun per la prevenziun d'accidents (PPA).

Motivs, pertge che uffants surprendan:

• Ils uffants èn leghers e sa laschan distrair svelt
• Els na san anc betg valitar bain ils privels
• Ils uffants èn anc pitschens ed han ina vista limitada
• Els na san anc betg valitar bain las distanzas e las sveltezzas
• Uffants na san anc betg localisar ed identifitgar bain las ramurs

Tschintg tips gidan a render la via da scola pli segira per ils uffants:

• Faschai quint cun tut tar uffants
• Sajas pronta/pront da franar
• Reduci la sveltezza
• Fermai dal tuttafatg a la strivla melna
• Faschai dubla attenziun en ils conturns da las scolas

Dapli preschientscha da la polizia il cumenzament da scola

Per segirar las vias da scola e per proteger las participantas ed ils participants dal traffic ils pli giuvens, vegn la Polizia chantunala dal Grischun a far dapli controllas da la sveltezza e da las vias da scola en las vischnancas. Parallelamain frequentan las instructuras ed ils instructurs da traffic da la Polizia chantunala dal Grischun tut las scolinas e mussan als uffants, co ch'els ston sa cuntegnair per traversar la via.