Navigation

Inhaltsbereich

  • Erste Mitteilung
  • Neuen Beitrag einfügen

Il 1. da schaner 2022 vegn Walter Schlegel, cumandant da la Polizia chantunala dal Grischun, a surpigliar il presidi dal Concordat da polizia da la Svizra Orientala. Durant ils proxims 3 onns vegn el a manar quest gremi.

En in rom pitschen, ma degn ha il president vertent Bruno Zanga, cumandant da la Polizia chantunala da Son Gagl, surdà il presidi dal Concordat da polizia da la Svizra Orientala a ses collega d'uffizi Walter Schlegel. L'um da 59 onns vegn a manar las fatschentas durant ils proxims 3 onns. Il medem mument daventa Walter Schlegel commember da la suprastanza da la Conferenza dals cumandants da las polizias chantunalas da la Svizra. «Jau ma legrel sin las sfidas sco president dal Concordat da polizia da la Svizra Orientala ostpol.ch. A medem temp sun jau conscient da la responsabladad che jau hai, da represchentar ils interess da las regiuns polizialas da la Svizra Orientala», uschia Walter Schlegel.

Dal Concordat da polizia da la Svizra Orientala fan part ils chantuns Appenzell Dador ed Appenzell Dadens, Glaruna, Grischun, Son Gagl, Turgovia, Schaffusa, las polizias da las citads da Cuira e da Son Gagl sco er la polizia dal Principadi da Liechtenstein.

Foto
Walter Schlegel e Bruno Zanga a chaschun da la surdada da las fatschentas ils 29 da november 2021 a Cuira
Neuer Artikel