Glindesdi avantmezdi ha la Polizia chantunala dal Grischun preschentà en ina conferenza da medias a Landquart la Statistica criminala da la polizia 2021. Per l'emprima giada vegnan preschentads malfatgs en il sectur da la criminalitad digitala che mussan ina tendenza creschenta. Legraivel è il regress tar ils delicts da violenza.
En il chantun Grischun èn vegnids registrads l'onn passà 9165 delicts. Quai èn 339 dapli che l'onn 2020. La pli gronda part èn malfatgs cunter il Cudesch penal, numnadamain 6'575 (onn precedent 6'531). En il sectur da la criminalitad digitala, che vegn preschentada per l'emprima giada en la statistica, èn vegnids commess 570 delicts (onn precedent 334). Da quels pertutgan 81,4 % la cybercriminalitad economica, 15,1 % cyberdelicts sexuals e 3,5 % cyberdisfamaziuns ed in cumportament illoial.
Augment tar ils delicts da facultad
Cun 62,2 % (60,5 %) furman delicts cunter la facultad la part la pli gronda dals malfatgs tenor il Cudesch penal. Dals 4'092 malfatgs èn 40,0 % delicts d'enguladitsch (onn precedent 44,6 %), 15,5 % èn delicts d'enguladitsch da vehichels (onn precedent 14 %) e 14,6 % pertutgan donns materials (onn precedent 12,7 %). Ils 14,8 % restants sa repartan sin engion (194 cas), extorsiun (15 cas), delicts da concurs e da scussiun (22 cas), rapina (25 cas) ed enguladitschs cun strair or da maun (4 cas).
Auta quota da scleriment e dumber regressiv da delicts da violenza
Legraivla è la reducziun dals delicts da violenza. L'onn 2020 èn vegnids registrads 689 cas, l'onn da rapport anc 543 (–20 %). En spezial è sa reducida la part da violenza greva applitgada da 30 a 26 delicts. La gronda part dals delicts da violenza èn smanatschas, acts da violenza, blessuras corporalas simplas, violenza e smanatschas cunter autoritads e cunter funcziunarias e funcziunaris sco er constricziuns. En il rom da relaziuns sumegliantas ad ina famiglia è sa reducida la violenza a chasa da 254 a 217 cas, 52 % da quels (onn precedent 68 %) pertutgan relaziuns actualas da pèrs resp. da partenadis. Da tut ils delicts da violenza han 92 % pudì vegnir sclerids.
Leva reducziun dals delicts concernent ils narcotics
Las cuntravenziuns registradas cunter la Lescha da narcotics èn sa reducidas levamain en cumparegliaziun cun l'onn precedent. L'onn 2021 èn vegnidas registradas tut en tut 1'152 denunzias. Quai èn 36 denunzias damain che l'onn precedent e correspunda ad ina leva reducziun da 3 pertschient. S'augmentadas èn las denunzias pervia dal commerzi cun narcotics. Tut en tut èn vegnidas registradas 176 denunzias (+20 %). Il pli savens è vegnì denunzià il commerzi cun products da cannabis, suandà da stimulants (cocain, amfetamins, ecstasy) e da heroin.
L'Uffizi federal da statistica (UST) ha eruì per l'onn 2020 per l'emprima giada las cifras per il sectur da la criminalitad digitala. Quai mussa ch'igl ha gì lieu ils ultims onns in transferiment ed in'expansiun dals delicts en l'internet. Tenor la statistica tutgan passa 70 % dals engions registrads en l'entira Svizra al sectur da la criminalitad digitala. La quota da scleriment da tals cyberengions è – tenor il UST – dentant mo tar stgars 40 %. Vitiers vegn il dumber zuppà, stimà aut, da cas da cybercriminalitad che na vegnan betg denunziads. Per optimar la quota da scleriment e per cumbatter malfatgs en il cybersectur ha la Polizia chantunala dal Grischun fixà la finamira d'esser activa pli savens er en la prevenziun. Quai per sensibilisar la populaziun areguard cyberfenomens, quai ch'è in element-clav en il cumbat cunter la cybercriminalitad. Barbara Hubschmid ha punctuà a chaschun da la conferenza da medias ch'il meglierament permanent en las tacticas da retschertga repressivas, l'evaluaziun e la cumpra dals meds auxiliars tecnics ils pli novs sco er l'intensivaziun da la collavuraziun intercommunala ed internaziunala tranter las autoritads da persecuziun penala, ils instituts da finanzas e las persunas privatas tutgan – ultra da la lavur da prevenziun – tar il cyberservetsch a la fatschentas quotidianas.
La Statistica criminala da la polizia 2021 stat a disposiziun online sut www.kapo.gr.ch.