La nova Basa da polizia Engiadin'Ota-Bregaglia ha pudì vegnir messa en funcziun l'avrigl 2022. En l'Engiadin'Ota sco er en la Bregaglia sa focussescha la Polizia chantunala dal Grischun sin ulteriurs lieus ch'èn sa cumprovads per ina basa, ed envida al di da las portas avertas en la basa principala a Samedan.
Fin ch'il center administrativ a la staziun da Samedan po vegnir realisà è il post da polizia existent vegnì fusiunà per il 1. d'avrigl 2022 en la surbajegiada Porta a Samedan cun las basas da polizia San Murezzan, Silvaplauna e Castasegna. Per pudair cuntinuar confurm a la prestaziun cun il servetsch da la Polizia chantunala dal Grischun en l'Engiadin'Ota sco er en la Bregaglia stattan ils locals da biro a San Murezzan ed a Castasegna vinavant a disposiziun en ina furma modifitgada. La basa a Silvaplauna croda davent, perquai che la Basa da la polizia da traffic Engiadina vegn en il futur er a sa chattar en la Porta a Samedan.
Curtas vias ed ina strategia d'acziun mobila
En la Porta a Samedan survegnan las collavuraturas ed ils collavuraturs da la Basa da polizia Engiadin'Ota-Bregaglia cundiziuns optimalas per furnir las prestaziuns en moda effizienta. Andrea Mittner, schef da la regiun Engiadina, di: «Questa basa moderna permetta d'avair ina survista e procura per curtas vias d'intervenziun.» Cun las pussaivladads tecnicas ch'èn concepidas per ina strategia d'acziun mobila pon las collavuraturas ed ils collavuraturs elavurar cas directamain al lieu d'eveniment ed independentamain da la basa.
Program dal di da las portas avertas
Sonda, ils 23 d'avrigl 2022, da las 10.30 fin las 16.30, vegn la nova Basa da polizia preschentada a la populaziun. Ils cumandant da la Polizia chantunala dal Grischun, colonel Walter Schlegel, davart l'idea dal di da las portas avertas: «Nus essan engraziaivels che la Regenza ans ha pussibilità questa basa en l'Engiadin'Ota. Quest plaschair vulessan nus parter cun la populaziun e – durant il di da las portas avertas – tgirar in bun contact cun ella sco er la preschentar la lavur da questa basa da polizia.»
La Polizia chantunala dal Grischun sa legra da numerusas visitadras e visitaders!
Fegl d'infurmaziun Di da las portas avertas a Samedan
