La Polizia chantunala dal Grischun ha quatter novas polizistas e quatter novs polizists. Il venderdi saira èn ellas ed els vegnids integrads en il corp en il rom d'ina festa che ha gì lieu en l'Auditori da la Banca chantunala grischuna a Cuira.

Cun dar il maun sur la bandiera dal corp han las otg novas commembras e novs commembers dal corp dà lur empermischun d'uffizi al cumandant, colonel Walter Schlegel. En substituziun dal schef dal departament Peter Peyer ha il president da la Regenza Marcus Caduff gratulà a las persunas saramentadas en sia allocuziun per l'examen professiunal federal reussì. Duas persunas han fatg l'examen il favrer a la scola da polizia a Giubiasco, sis pir dacurt a la scola da polizia ad Amriswil. La scola da polizia 2020–2022 è l'emprima che ha durà 2 onns tenor il concept general da la politica da furmaziun.

Las collavuraturas ed ils collavuraturs sco er il clima da lavur en il focus
Per l'emprima giada han las saramentaziuns e las promoziuns gì lieu a chaschun d'ina festa, ch'è vegnida enramada musicalmain da la Musica da polizia dal Grischun. Il cumandant Walter Schlegel ha accentuà ch'i saja il grond art e l'incumbensa da tuttas e tuts d'unir l'experientscha da la generaziun pli veglia cun la nova, buna savida teoretica ed orientada a las cumpetenzas da la giuvna generaziun. A las diplomadas ed als diplomads ha el ditg: «In grad pli aut porta er dapli responsabladad, cunzunt en il sectur da la direcziun dal persunal. Vossa incumbensa è quella d'As occupar, da sustegnair e da promover Vossas collegas e Voss collegas sco er Voss teams. Nus essan tuttas e tuts dumandads da procurar per in bun clima da lavur.»