A chaschun d'ina conferenza da medias a Cuira ha la Polizia chantunala dal Grischun preschentà glindesdi avantmezdi la Statistica criminala da la polizia 2022. Il dumber da cuntravenziuns cunter il Cudesch penal è s'augmentà per 30 % cumpareglià cun l'onn precedent. Allegraivla è percunter la leva reducziun da delicts en il sectur da la criminalitad digitala.
En il chantun Grischun èn vegnids registrads 11 234 delicts l'onn passà. Quai èn 2069 resp. var 23 % dapli che l'onn 2021. La gronda part èn malfatgs cunter il Cudesch penal, numnadamain 8531 (onn precedent: 6575). Da l'augment dal dumber da delicts è pertutgada principalmain l'aglomeraziun da Cuira, nua ch'i èn vegnids commess 43 % dals delicts cunter il Cudesch penal.
29 % dapli malfatgs cunter la facultad
62 % da tut las cuntravenziuns cunter il Cudesch penal concernan malfatgs cunter la facultad. Il dumber da delicts da facultad è s'augmentà l'onn 2022 per 29 %, numnadamain da 4092 sin 5289. A medem temp ha er la quota da scleriment pudì vegnir auzada da 34 % sin passa 40 %. La gronda part dals malfatgs da facultad èn enguladitschs, numnadamain 2354 cas (onn precedent: 1635). Quai èn principalmain enguladitschs generals (581), enguladitschs cun infracziun (553), ladernitschs clandestins (476) ed enguladitschs en negozis (315). In fatg allegraivel è che 51,5 % dals enguladitschs cun infracziun han pudì vegnir sclerids (onn precedent: 37,9 %).
Cifras stagnantas tar ils delicts cun meds narcotics
En il sectur da las cuntravenziuns cunter la Lescha da narcotics sa movan las cifras dapi plirs onns pli u main sin il medem nivel, quai cun pitschnas divergenzas. Quai vala tant per il consum sco er per il commerzi. Dals totalmain 1240 malfatgs èn 461 vegnids commess a Cuira, 327 en Engiadina e 284 en la regiun Rain-Moesa. Consumads sco er vendids vegnan principalmain products da chonv.
Augment da bunamain in terz tar ils delicts da violenza a chasa
Tar ils delicts da violenza greva hai dà in augment da 26 sin 45 cas resp. da 73 % cumpareglià cun l'onn precedent. Il dumber da delicts da mazzament accumplids ed empruvads è creschì dad 1 sin 5. Ils 45 delicts da violenza greva pertutgan – ultra dals delicts da mazzament – 27 blessuras corporalas grevas e 13 violaziuns. 91,1 % dals delicts da violenza applitgada greva han pudì vegnir sclerids (onn precedent: 92,3 %).
En connex cun violenza a chasa èn vegnids registrads 284 delicts penals l'onn 2022. Quai è in augment da 31 %. Ils causals penals ils pli frequents èn metter maun vi da persunas, smanatschas ed ingiurias. La mesadad da tut ils cas da violenza a chasa pertutgan relaziuns da partenadi.
Leva reducziun da las cifras en il sectur da la criminalitad digitala
Cumpareglià cun l'onn 2021 è il dumber da delicts en il sectur da la criminalitad digitala allegraivlamain sa reducì per bunamain 10 % a 516 cas registrads. Passa 80 % dals delicts pertutgan la cybercriminalitad economica, 16 % èn cyberdelicts sexuals. Passa 50 % da tut ils delicts da criminalitad digitala èn cyberengions.
La statistica detagliada vegnir consultada en l'internet sut Servetschs - Statistica.
maletg simbolic