Per dumagnar ils svilups e las sfidas che sa midan permanentamain ha la direcziun da la Polizia chantunala dal Grischun analisà l'onn passà globalmain las sfidas actualas e deducì da questa analisa las directivas d'agir relevantas. Resultada è la strategia Kapo GR 2025+.
Ils ultims onns èsi sa mussà, che las incumbensas da la polizia daventan pli e pli cumplexas sco er che las pretensiuns sa midan cuntinuadamain e sa sviluppan vinavant en in tempo rasant. Las directivas strategicas e finamiras operativas che vegnivan elavuradas fin ussa mintga 5 onns, na pon betg pli tegnair quint cumplainamain da quests svilups. La strategia Kapo GR 2025+ è il resultat d'in process d'analisa accurat ed intensiv. En quest process èn vegnidas identifitgadas las sfidas actualas da la Polizia chantunala dal Grischun e deducidas directivas d'agir. Questa nova orientaziun strategica furma il fundament per la lavur futura da la Polizia chantunala dal Grischun. Quai per reagir en moda effectiva ed effizienta a las pretensiuns che sa midan.
Mantegnair e rinforzar las cumpetenzas centralas
Cun la strategia Kapo GR 2025+ ha la Polizia chantunala dal Grischun l'intent da mantegnair, da rinforzar e d'optimar cun mesiras sistematicas las cumpetenzas centralas da la polizia, vul dir la gestiun d'eveniments e la persecuziun penala. Las iniziativas strategicas fixadas gidan a realisar la strategia. Ellas preschentan vias progressivas per dumagnar las sfidas actualas relevantas per la polizia, en ils tschintg secturs: direcziun e cultura d'interpresa, patrun attractiv, digitalisaziun, prevenziun e management da las parts involvidas.
In aspect central da la strategia Kapo GR 2025+ è la promoziun d'ina chapientscha da la direcziun da persunal moderna, persistenta e confurma al temp e d'ina scolaziun da manar persunal cun cleras finamiras. Ultra da quai dat la Polizia chantunala dal Grischun gronda paisa a la garanzia d'in dumber suffizient da persunal, da material, da vehichels e d'infrastructura. Mo cun las dretgas resursas po la polizia ademplir efficaziamain sias incumbensas e garantir la protecziun da la populaziun.
Per augmentar l'efficacitad e l'effizienza vegn la Polizia chantunala dal Grischun a concentrar sias forzas e sias abilitads sin sias cumpetenzas centralas, vul dir la direcziun en l'acziun, la defensiun da privels sco er la persecuziun e l'inquisiziun penala. Quai permetta in'orientaziun sistematica a las fatschentas strategicas segirezza dal traffic, cumbat cunter la criminalitad e segirezza publica, e pia a la furniziun da las prestaziuns respectivas. Tras questa focussaziun vulan ins cuntanscher ina reducziun da las mesiras repressivas.
La transfurmaziun digitala gioga medemamain ina rolla centrala en la strategia Kapo GR 2025+. La Polizia chantunala dal Grischun vegn ad extender sias cumpetenzas da polizia grazia a mesiras da digitalisaziun sistematicas. Il diever da las tecnologias las pli modernas e l'elavuraziun da soluziuns digitalas pussibiliteschan ina lavur da polizia pli effizienta e pli effectiva.
Ina stretga collavuraziun cun partenarias e partenaris è in'ulteriura clav per realisar cun success las finamiras strategicas. La Polizia chantunala dal Grischun vegn a concentrar sias forzas ed a collavurar stretgamain cun auters corps da polizia, cun autoritads e cun interpresas, e quai sin plaun chantunal ed interchantunal, sin plaun federal sco er sin plaun transcunfinal ed internaziunal, per garantir la segirezza ed il bainstar da las burgaisas e dals burgais. Tras questa collavuraziun colleghiala pon ins trair a niz sinergias e duvrar efficaziamain las resursas.
Cun la strategia Kapo GR 2025+ metta la Polizia chantunala dal Grischun in cler segn per ina lavur da polizia moderna e favuraivla a las burgaisas ed als burgais. La strategia vegn realisada pass per pass ed accumpagnada d'in management strategic.
Ad occurrenzas d'infurmaziun che han gì lieu en l'entir chantun, han il cumandant da polizia Walter Schlegel ed il schef da stab Adrian Sommer infurmà en il decurs da las ultimas emnas tut las collavuraturas ed ils collavuraturs davart la nova strategia e respundì dumondas respectivas.
Infurmaziuns
Ils 3 da fanadur 2023, da las 14.00 fin las 15.30, dat il cumandant da la Polizia chantunala dal Grischun, colonel Walter Schlegel, infurmaziuns en il rom da questa communicaziun. Termins ston vegnir fixads sur il numer da telefon 081 257 79 50.
Broschura strategia Kapo GR 2025+
Prospect strategia Kapo GR 2025+