La Polizia chantunala dal Grischun ha 5 novas polizistas e 16 novs polizists. Suenter 2 onns d'instrucziun han els terminà cun success l'examen professiunal federal. Gievgia èn els vegnids prendids si en il corp da polizia, quai a chaschun d'in act festiv en preschientscha da lur famiglias e da giasts.

Cun l'empermischun che las persunas saramentadas da nov han dà al cumandant Walter Schlegel, han ellas empermess d'observar la Constituziun e las leschas, la discreziun d'uffizi sco er da tractar tut ils umans da medema maniera. «Vus n'essas betg mo protecturas e protecturs da dretg e d'urden, mabain er persunas da confidenza e da contact e mintgatant ultima speranza per umans en situaziuns difficilas» ha ditg Walter Schlegel. «L'examen professiunal federal conferma vossas enconuschientschas spezialas, vossa abilitad da giuditgar e vossa professiunalitad. Ma el n'as po betg mussar, tge che munta cumpassiun, quant impurtanta ch'è empatia e quant prezius ch'igl è, da scuntrar in auter uman cun respect. Questas valurs ed abilitads avais vus en vus sezs – e cun il di dad oz confermais vus che vus las vulais applitgar en il servetsch a favur da la populaziun.» Il cusseglier guvernativ Peter Peyer ha gratulà a las polizistas ed als polizists gist saramentads: «Vus essas pronts da prestar in servetsch a favur da la cuminanza, a favur da la segirezza publica e Vus meritais noss pli grond respect ed engraziament.»

A chaschun da la festa en l'auditori da la BCG èn er vegnids promovids 3 uffiziers e 23 polizistas e polizists cun novas funcziuns en rangs pli auts. Plinavant èn vegnids saramentads 13 commembras e commembers dal corp da polizia ed in assistent da segirezza sco er beneventads diesch novas collavuraturas e novs collavuraturs civils – tuts èn arrivads en il decurs da l'onn tar la Polizia chantunala dal Grischun.

Midada en la direcziun
En la direcziun da la Polizia chantunala dal Grischun hai dà midadas da persunal. Aluis Candinas è dapi il 1. d'avust schef da la Polizia criminala. L'um da 40 onns remplazza Barbara Hubschmid che ha surpiglià ina plazza ordaifer la polizia en il chantun Son Gagl. Sia funcziun anteriura sco schef da la partiziun Commando ha surpiglià Peter Blatter (38). Lukas Christen da 39 onns è vegnì elegì per il 1. d'avrigl sco schef da la Polizia da traffic. Gia dapi la primavaira 2024 fa Michael Huber (52) part da la direcziun, quai sco schef da Logistica e tecnica.